Ferdinand Alfreðsson fæddist 17. september 1937 í Hamborg í Þýskalandi. Hann lést á Landspítalanum 28. mars 2021. Foreldrar hans voru Helga Einarsdóttir húsmóðir, f. 4.8.1897 á Fremra-Hálsi, Kjósarhreppi, d. 4.12.1968, og Alfreð Ferdinandsson Münch yfirmatreiðslumaður, f. 17.6.1899 í Hamborg, d. 2.12.1973. Systkini Ferdinands voru Inga María f. 1923, d. 2014, Sigrid Agnes f. 1927, d. 2000, og Viktor Einar f. 1929, d. 2018. 

Ferdinand kvæntist 26. september 1964 Guðrúnu Frímannsdóttur píanókennara, f. 15. janúar 1943, d. 18. apríl 1998. Börn þeirra eru: 1) Frímann Ari íþróttafræðingur f. 22.2.1967, kvæntur Ingibjörgu Ragnarsdóttur f. 10.1.1973, sonur hennar og stjúpsonur Frímanns er Ragnar Raul f. 29.12.1993, dætur Frímanns af fyrra hjónabandi eru Guðrún Ósk f. 6.1.1998 og Hanna Björk f. 6.3.2002; 2) Helga Margrét bókmenntafræðingur f. 14.8.1969, gift Sigurjóni Halldórssyni f. 7.7.1963, börn þeirra eru Sólrún f. 26.7.2006 og Vésteinn 8.10.2008; 3) Kristinn Alfreð ferðamálafræðingur f. 20.9.1978, unnusta Arndís Anna Reynisdóttir f. 2.12.1979, börn þeirra eru Alexandra Júlía f. 28.10.2008, Emil Henry f. 23.4.2012 og Aron Logi f. 28.6.2016. 

Ferdinand lauk stúdentsprófi frá Verzlunarskóla Íslands 1959. Hann lauk fyrrahlutanámi í arkitektúr frá Carolo-Wilhelmina Universität i Braunschweig í Þýskalandi 1963 og lokaprófi í arkitektúr frá Universität Fridericiana i Karlsruhe 1968. Að loknu námi starfaði hann hjá Guðmundi Kr. Kristinssyni og Gunnlaugi Halldórssyni við ýmis sameiginleg verkefni þeirra. Frá árinu 1973 rak Ferdinand arkitektastofu í félagi við Guðmund Kr. og áfram eftir hans dag.

Ferdinand og Guðmundur Kr. hönnuðu saman margar stórbyggingar, m.a. skrifstofuhús Olíufélags Íslands við Suðurlandsbraut 18, höfuðstöðvar Rafveitu Reykjavíkur við Suðurlandsbraut 34, stjórnstöð Landsvirkjunar við Bústaðaveg, og Breiðholtskirkju, sem hlaut 1. verðlaun í samkeppni um hönnun kirkjunnar. Ferdinand gegndi mörgum trúnaðarstörfum fyrir Arkitektafélag Íslands, m.a. við útgáfu Arkitektatals. Hann var um margra ára skeið stjórnarmaður í Ljóstæknifélagi Íslands. Hann vann sýninguna Íslensk timburhús sem sett var upp á Kjarvalsstöðum á Listahátíð í Reykjavík 1972 og sýningu á vegum Ljóstæknifélagsins og Philips í tilefni af 100 ára afmæli Edison-ljósaperunnar 1979. Ferdinand var formaður SÍBS-deildarinnar á Vífilsstöðum 1994–1999.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Ferdinand Alfreðsson

Útför

Ertu með minningargrein?