Starfsfólki göngudeildar lyflækninga á SAK og Heimahlynningu færum við okkar allra bestu þakkir fyrir einstaka alúð og umhyggju. Þið eruð englar í mansmynd. 

Eyþór Jónsson fæddist 22.apríl 1961 á Húsavík. Hann lést á Sjúkrahúsinu á Akureyri 8.júlí. 2024.

Foreldrar hans voru Jón Ólafur Hermannsson, f. á Baldurshaga, Flatey á Skjálfanda 12.apríl 1918, d. 26.ágúst 2006 og Stefanía Tómasína Jóhannesdóttir f. á Kaðalstöðum, Hvalvatnsfirði 8.nóvember 1926, d. 6.október 2020.

Systkini Eyþórs eru Hermann Jóhannes , f. 30. september.1946, hans kona er Hildur Gunnarsdóttir f. 15.júlí. 1946. Sigurveig, f. 30.janúar 1949, hennar maður er Guðmundur Sigurðsson, f. 22. Maí 1939 og Sölvi f. 25.janúar 1954. d.10.september. 2013,  hans kona er Kristín Guðmundsdóttir f. 21 september 1954.  

Eyþór ólst uppí Flatey á Skjálfanda þar til árið 1967 þegar allir fluttu frá eyjunni. Hann fluttist með foreldrum sínum til Húsavíkur.  Þar bjó hann þar til hann flutti til Akureyrar til að fara í VMA. Hann byrjaði ungur að vinna í fiski t.d. söltun, uppskipun og voru skólakrakkar oft fengnir til að bjarga verðmætum sem var ekki illa séð af krökkunum að vinna sér inn pening og fá frí frá skólanum. Um fermingaraldur gerðist hann sjómaður og réri t.d með Jóa bróður sínum. Hann prufaði líka að vera sjókokkur á öðrum bát frá Húsavík. Enda var hann afbragðskokkur og hafði mikinn áhuga á matseld. Einnig var hann mikið í sveitinni hjá systur sinni í Fagranesi, Aðaldal og hjálpaði til við sveitarstörfin. Þegar hann fluttist til Akureyrar vann hann hin ýmsu störf t.d vann hann í Slippnum, Blikkrás, Blikk og Tækniþjónustunni og í Sjallanum. Systkinin eiga æskuheimilið Berg í Flatey og þangað reyndi hann að fara á hverju sumri meðan heilsan leyfði. Flatey átti alltaf stóran hlut í hjarta hans.

Hann eignaðist tvö börn með Báru Sævaldsdóttur f. 9.mars 1969.  Þau eru Sævaldur Þór f. 11.október 1994 og Ragnhildur Stefanía f. 28.nóvember. 1996. Þau búa á Flúðum. Hennar maður er Bergsveinn Breiðfjörð Theodórsson f. 6. Desember 1982.  Þau eiga Eystein Breiðfjörð f. 7.janúar 2019,  Arnald B. f. og d. 25. ágúst 2021 og Eikar B. f. og d. 25 ágúst 2022. Bergsveinn á fyrir Baltasar B. f.22. nóvember 2012.

Þann 30.desember 2006 giftist Eyþór eftirlifandi eiginkonu sinni Bjarnveigu Brynju Sverrisdóttur f. 5. Október 1968 og eignuðust þau Bergþór Skúla f.20.júní 2007. Frá árinu 2005 hafa þau búið í Dalsgerðinu á Akureyri.

Þegar kom að því að ákveða hvað skyldi gera í framtíðinni varð grunndeild málmiðnaðar í Verkmenntaskólanum Akureyri fyrir valinu. Hann varð blikksmíðameistari árið 2000. Hann vann lengst af hjá Blikk og Tækniþjónustunni. Eyþór var lengi í stjórn FMA og var gerður að heiðursfélaga í mars síðastliðnum. Hann greindist með mjög sjaldgæfa tegund krabbameins mánaðarmótin okt/nóv 2018. Hann gekk í gegnum óteljandi meðferðir með bros á vör, æðrulaus, alltaf til í næsta slag studdur af frábæru starfsfólki göngudeildar lyflækninga á SAK. Hann var t.d sá fyrsti sem fór í plasmaskilun á Akureyri.  Árið 2020 eftir að hann þurfti að hætta að vinna vegna sjúkdómsins þá ákvað litla fjölskyldan að byggja lítinn bústað í Aðaldalnum. Með miklu harðfylgi náði hann að gera hann fokheldann og einnig gróðursetti hann þúsundir plantna kringum bústaðinn. Hann hafði mikinn áhuga á skógrækt og var með fagurgræna fingur, ræktaði t.d. jarðarber og hindber og nær allar plöntur sem hann gróðursetti við bústaðinn „ól“  hann upp sjálfur. Hann tók þátt í félagskap sem kallast Kátir Karlar en þeir hittast 1x í viku yfir vetrartímann. Það gaf honum mikið að hitta karlana og ræða um alla heima og geima. Í apríl 2022 byrjaði hann upp á sitt einsdæmi að safna fyrir meðferðarstólum til að nota á göngudeild lyflækninga á SAK og náði hann að safna fyrir 3 stólum sem afhentir voru í janúar 2023. Eyþór var eldheitur Liverpool aðdáandi og komst litla fjölskyldan í langþráða ferð á leik í Liverpool í september 2023.

Fyrst og fremst var Eyþór mikill fjölskyldumaður, var óendanlega stoltur af börnunum sínum og afakút. Hann var vinur vina sinna, hjálpsamur, traustur, nægjusamur, vinnusamur þúsundþjalasmiður. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Eyþór Jónsson

Útför

Þakkir

Ertu með minningargrein?