[DEFAULT]

Þakklæti er mér efst í huga þegar ég kveð elskulegan tengdaföður minn í dag. Þakklæti fyrir hlýjar móttökur þegar ég kom í fjölskylduna og ætíð síðan fann ég fyrir umhyggju, hjálpsemi, velvilja og  vináttu.

Elís fæddist og ólst upp í Keldudal í Dýrafirði, hann náði 95 ára aldri og man því tímana tvenna. Voru sumar af sögunum hans ævintýri líkastar enda bjó hann í torfbæ til 12 ára aldurs, sótti sjóinn á opnum áttæringi, sópaði upp krækiberjum með strákústi og silgdi á stríðsárunum milli Íslands og Bretlands svo eitthvað sé nefnt.

Tengdapabbi hafði marga mannkosti, hann var ljúfur, æðrulaus, ósérhlífinn, sjálfstæður, talaði aldrei illa um neinn, handlaginn og ráðagóður. Ungur maður fékk hann berkla sem breyttu lífsáformum hans, í stað þess að stunda sjóinn fyrir vestan, tók við sjúkrahúsvist og  síðan endurhæfing á Reykjalundi þaðan sem hann nam trésmíði og kynntist lífsförunauti sínum, Önnu Jóhönnu Óskarsóttur. Bar hann ætíð hlýhug til Reykjalundar. 

Elís var ern og upplýstur maður og kom maður aldrei að tómum kofanum þegar maður leitaði til hans, sama hvort það tengdist sögunni og fyrri tímum, fréttum líðandi stundar, stjórnmálum, íþróttum, húsbyggingum, garðplöntum, veðrinu eða fréttum að fjölskyldunni. Hann hafði mikinn lífsvilja og leið best með fólkinu sínu, ljómaði þegar barnabörnin og barnabarnabörnin voru nálægt. Var honum umhugað um að geta tekið vel á móti öllum og fannst mikilvægt að eiga hinar ýmsu uppáhalds kextegundir, íspinna og góðgæti fyrir gesti sína bæði stóra og smáa.

Minningarnar eru margar og dýrmætar, dásamlegar ferðir vestur á æskuslóðirnar, samveran í sumarbústaðnum, Kanarýeyjaferðirnar, ýmsir viðburðir og allar hversdaglegu stundirnar. 

Með þakklæti í hjarta kveð ég þig elsku tengdapabbi, 

Hvíl í friði og takk fyrir samfylgdina

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Elís Gunnar Kristjánsson

Útför

Minningarorð