Elís Gíslason, skipstjóri fæddist á Grund í Eyrarsveit, 26. nóvember 1932. Hann andaðist á Dvalar- og hjúkrunarheimilinu Fellaskjóli, Grundarfirði 26. apríl 2020. Foreldrar hans voru hjónin Gísli Karel Elísson, bóndi á Grund og verkamaður í Grafarnesi, Eyrarsveit f. 10. maí 1899, d. 25. desember 1973 og Jóhanna Hallgerður Jónsdóttir, húsfreyja f. 27. júlí 1906, d. 4. maí 1937. Systur Elísar eru Vilborg Guðrún f. 16. júlí 1927, d. 2. júní 1979, Pálína fædd 27. janúar 1929 og Hólmfríður fædd 6. september 1935. Eiginkona Elísar er Hulda Valdimarsdóttir f. 13. maí 1936 á Kljá í Helgafellssveit.  

1) Valdimar, f. 8. janúar 1963, maki Guðlaug Sturlaugsdóttir. Börn: Elís og Svanhildur. Sonur Svanhildar er Bjarni Þór. 

2) Jóhanna, f. 20. mars 1964, maki Gísli Bachmann. Börn: Sigurður Karel og Njörður Elís. 

3) Ragnheiður, f. 20. nóvember 1966, maki Haukur Tómasson. Börn: Hulda Kristín og Anna Soffía. 

5) Katrín, f. 21. nóvember 1973. Barn: Hulda Þóra. 

6) Gísli Karel, f. 25. janúar 1977, maki Vala Ólöf Jónasdóttir. Börn: Elís, Tinna og Lára.

Elís hóf sjómennsku ellefu ára gamall. Hann var háseti, kokkur, stýrimaður og vélstjóri á fjölmörgum skipum sem gerð voru út frá Grundarfirði. Lengst af var hann skipstjóri og meðeigandi af mb. Grundfirðingi SH 12. Á árunum 1988 til 1995, eftir að hafa þurft að fara í land vann hann við útgerðina við netafellingar og sinnti veiðarfærum. Árið 1995 keypti hann smábátinn Byr SH 9 ásamt eldri syni sínum og gerði hann út til ársins 1998, er hann hætti sjómennsku. Elís tók minna mótorvélstjórapróf frá Reykjavík 1954 og minna fiskimannapróf frá Stýrimannaskólanum í Reykjavík 1958.

[DEFAULT]

Kveðja frá dóttur, Ragnheiði Elísdóttur

Ég kveð föður minn Elís Gíslason og langar til að minnast hans með fáeinum orðum. 

Pabbi var fjölskyldumaður, naut þess að vera með sínum nánustu og hélt afar vel utan um hópinn sinn. Hann missti móður sína þegar hann var barn að aldri og ólst upp hjá einstæðum föður og var afar kært á milli þeirra feðga alla tíð. Pabbi eins og afi var kærleiksríkur faðir og lék við okkur börnin, sagði okkur sögur fyrir svefninn, sagan af Búkollu var vinsælust. Hann tók okkur með að veiða í vötnum, fór með okkur á skauta og við systkinin fengum að fara með honum þegar hann sigldi til Reykjavíkur með skip sitt í slipp. Það var ferðast á hverju sumri um landið með tjald og síðar tjaldvagninn, allar hafnir heimsóttar og sagðar sögur af skipum. Það var farið í ferðalög um hverja verslunarmannahelgi, m.a. í Húsafell þegar við vorum yngri þar sem ég man eftir að hafa heyrt í Spilverki þjóðanna. Einnig var farið að Úlfljótsvatni þegar við elstu vorum komin á unglingsaldur og þar heyrði ég í fyrst í Megasi en pabbi hefði nú sjálfur viljað heyra harmonikkutónlist. Hann var vel að sér um landið okkar og fannst gaman að fylgjast með líðandi stundu, hlustaði á alla fréttatíma á öllum miðlum og alltaf á veðurfréttir sem var okkur systkinum stundum þrautarstund en þá varð að hafa hljóð. Hann hafði engan áhuga á stjórnmálum en var áhugamaður um náttúru og vísindi. Hann fór ungur á sjó og var farsæll skipstjóri og útgerðarmaður, síðar smábátasjómaður og netamaður. Hann var afar stoltur af okkur krökkunum sínum og studdi okkur til mennta og rak tvö heimili í mörg ár, eitt í Grundarfirði og hitt í Reykjavík á meðan við sóttum framhaldsnám  og háskólanám. Þegar við systkinin fluttum að heiman fóru pabbi og mamma að ferðast til útlanda með vinafólki og síðar með okkur systkinunum og eldri borgurum. Hann var mjög hrifinn af Þýskalandi, fór til Hollands og Grænlands og var yfir sig hrifinn þegar hann heimsótti Færeyjar. Síðustu árin voru ár veikinda sem en hann hafði mikinn lífsvilja og lagði mikið á sig til að ná betri heilsu og líðan. Hann var okkur afar þakklátur fyrir stuðninginn í veikindum sínum og okkur var ljúft að fá að standa við hlið hans og styðja. Hann fór sáttur en er sárt saknað. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Elís Gíslason

Útför

Kveðja frá dóttur, Ragnheiði Elísdóttur