Okkar ástkæra Elínborg Guðmundsdóttir (Ella) leirlistamaður til heimilis að Arkarholti 1 Mosfellsbæ. Lést í faðmi barna sinna sunnudaginn 17 júlí.

til HERU og Krabbameinsdeild Landspítalans.

Elínborg Guðmundsdóttir (Ella) fæddist 18. október 1937 í Reykjavík. Hún lést í faðmi barna
sinna þann 17. júlí 2022.
Foreldrar hennar voru Ingibjörg Amelía Kristjánsdóttir, f. 7. október 1898, d. 24. mars 1974, og Guðmundur Albert Þórarinsson, f. 24. apríl 1903, d. 8. maí 1985.
Eldri bræður Ellu voru Hörður (sem ekki var samfeðra Ellu) og tvíburarnir Klemenz og
Þórarinn. Þeir eru allir látnir.

Ella giftist Ingimundi Eymundssyni, f. 24. ágúst 1935, 1957. Þau skildu 2014.

Börn þeirra eru: 1) Ellert Austmann, f. 17. ágúst 1957, leikari, giftur Evu Karlsdóttur. Synir
þeirra eru: a) Evert Austmann, giftur Helenu Hrund Ingimundardóttur. Synir þeirra eru
Maron Logi og Grétar Nóel. Fyrir á Evert Leonard Ben og Helena Hrund Rebekku. b) AronAustmann, trúlofaður Arnfríði Ósk Jónsdóttur.
2) Annetta Austmann, f. 15. október 1960, iðjuþjálfi, fjölskyldufræðingur og handleiðari, gift Bjarna Þorsteinssyni. Dætur þeirra eru: a) Birta Austmann, gift Edward Alexander Eiríkssyni. Sonur þeirra er Sölvi Leó. Fyrir á Edward Róbert Darra. b) Sunna Austmann.
3) Stúlka (Anna), f. 28. ágúst 1965, d. 29. ágúst 1965.
4) Rebekka Austmann, f. 12. júlí 1967, sviðslistahöfundur og markþjálfi, gift Sigurði Guðmundssyni. Fyrir á Sigurður Aðalborg Birtu, í sambúð með Róbert Davíðssyni. Þau eiga börnin Nóa og Rán.
5) Elísabet Austmann, f. 7. nóvember 1968, markaðsfræðingur MBA., gift Hilmari Garðar
Hjaltasyni. Synir þeirra eru tvíburarnir: a) Dagur Austmann og b) Máni Austmann. Fyrir á Hilmar Önnu Björk.


Ella lærði hárgreiðslu eftir hefðbundna skólagöngu. Hún vann sem hárgreiðslukona í nokkur ár þar til hún ákvað að helga barnauppeldi og heimili starfskrafta sína.
Ella var einstaklega mikill fagurkeri og með sterka sköpunarþrá. Þegar börnin voru kominn á legg hóf hún nám í Myndlistaskóla Reykjavíkur og hélt náminu áfram í Myndlista- og handíðaskóla
Íslands. Ella útskrifaðist þaðan sem leirlistamaður 1988. 

Ári síðar stofnaði hún ásamt fjórum öðrum leirlistakonum leirlistavinnustofuna og galleríið Art Hún. Árið 1995 varð hún að láta af störfum sem leirlistamaður vegna gigtar. 

Ella var félagi í SÍM og fékkst við myndlist á
heimili sínu og fylgdist náið með listsýningum og listrænni sköpun fram á hennar seinasta dag.

[DEFAULT]

Elsku Ella, hjartkæra hugrakka hlýja mamma mín,

Ég kveð þig með sársauka og hjarta mitt er yfirfullt af þakklæti fyrir allt sem þú kenndir mér, sýndir mér og hjálpaðir mér með að skynja og skilja. Ég á aðeins til þakklæti og virðingu yfir öllu sem við deildum saman um heima og geima sem er mér ógleymanlegt. Það var fátt eins gefandi en að tala um við þig langt fram eftir á kvöldin um listir, lífið, og mannfólkið enda fannst mér þú svo skemmtileg og við gátum hlegið endalaust af endavitleysunni.

Þú ýttir við mér að skynja fegurð í öllum formum og gerðum og fegurðaskyn þitt var þróaðra en flestra okkar hinna. Þú skapaðir okkur fjölskyldunni framúrstefnulegt, fallegt og hlýtt heimili þar sem þú varst svo útsjónarsöm við að gefa hlutum nýtt hlutverk og nýjan tilgang. Listræn sýn þín á hönnun, litum og formum var nýstárleg og voguð.

Þú varst svo flínk að beina mér á rétta leið þegar ég var týnd, bæði í leik og starfi. 

Þú sýndir verkefnum mínum ávallt einlægan áhuga og þú lagðir á þig langar leiðir til að sjá afraksturinn. Það styrkti mitt hjarta.

Þú hjálpaðir mér að skynja og skilja aðra með því að horfa á hlutina frá nýjum sjónarhornum.

Þú varst málsvari þeirra sem minna mega sín og réttlætiskennd þín var aðdáunarverð.

Víðsýni og fordómaleysi einkenndi þitt tal og hugleiðingar. 

Þú ert fyrirmynd mín og minn helsti áhrifavaldur.

Þú varst alltaf svo áhugasöm og hlý í garð vina minna, ég dáðist alltaf að því og þótti svo leitt þegar ég átti ekki svör við spurningunum þínum. Þó svo að ég byggi lengi erlendis þá vissir þú alltaf hverjir voru næst mínum hjartastað.

Þegar þú brostir og hlóst þá varð heimurinn skemmtilegur og undrafagur á augabragði. Þá var undravert að vera til í heimi hér með þér. 

Þú ert mamman mín, ég elska þig fallega mamman mín, þú ert næst hjarta mínu.

Þín dóttir með ást og virðingu út fyrir þennan heim og yfir í aðra, þín Bessý.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Elínborg Guðmundsdóttir

Andlátstilkynning

Útför

Aðstandendur

Þakkir

Kveðja með hjartatárum