Heittelskaður eiginmaður minn, faðir, sonur og bróðir lést á Kanaríeyjum 10. janúar

Útför fer fram frá Fossvogskirkju mánudaginn 7. febrúar kl. 13

Hjartans þakkir fyrir allan stuðninginn, hlýhug og kveðjur.

Einar Þór Egilsson fæddist í Reykjavík 23. ágúst 1980. 

Foreldrar hans eru hjónin Hrefna S. Einarsdóttir f. 1946 og Egill Þ. Einarsson, f. 1947. Systur Einars Þórs eru Agla Egilsdóttir f. 1972 og Alda Berglind Egilsdóttir f. 1978.

Eftirlifandi eiginkona Einars Þórs er Karen Olga Ársælsdóttir f.13. desember 1980. Einar og Karen gengu í hjónaband 6. ágúst 2005 og þann 13. júní sama ár fæddist þeim sonurinn Daníel Máni. Seinna bættust við dóttirin Ellen María, f. 20. desember 2008 og síðast sonurinn Baldur Már, f. 23. desember 2014.

Einar Þór ólst upp í neðra Breiðholti fyrstu árin en fluttist síðan með fjölskyldunni í Suðurhlíðarnar og bjó þar mestan hluta æskunnar.

Einar Þór stundaði grunnskólanám í Hlíðaskóla og lauk síðar námi í tölvunarfræði og stúdentsprófi við Iðnskólann í Reykjavík. Þá stundaði hann nám í tölvunarfræði við Háskólann í Reykjavík og lauk þar BS prófi með afburðaeinkunn. Þaðan lá leiðin til Kaupmannahafnar þar sem hann stundaði nám við Tækniháskóla Danmerkur, DTU og lauk þar MS gráðu í tölvunar-og hugbúnaðarverkfræði.

Á námsárum sínum stundaði Einar Þór ýmis störf og vann m.a. við uppsetningu tölvuforrita á skrifstofu Alþingis.

Einar og Karen bjuggu í Danmörku árin 2007 – 2014 og þar starfaði  Einar Þór að námi loknu sem hugbúnaðarverkfræðingur hjá Deltek og síðar við þróun hugbúnaðar hjá Trustpilot. Jafnframt því forritaði hann einfalda spilaleiki á netinu sér til gamans og stofnaði í kringum þá sitt eigið fyrirtæki Rauðás hugbúnað.

Eftir að fjölskyldan flutti heim til Íslands 2014 varð það hans aðalstarf og var fyrirtækið útnefnt eitt af „Fyrirmyndar fyrirtækjum“ áranna 2019-2021.

Einar Þór lærði og spilaði á hin ýmsu hljóðfæri, var dýravinur, lagði mikið af mörkum til mannúðarmála og var einstaklega umhyggjusamur fjölskyldumaður.

Þórleif Hoffmann Gunnarsdóttir

Elsku frænka 
Innilegar samúðarkveðjur til þín og barnanna ykkar.  Það er svo sárt að kveðja en þó tíminn lækni ekki sárin verður með tíð og tíma auðveldara að lifa með sorginni.
Kveðja, Leifa Klausturhólum


Víðir Már Hermannsson

Einar Arngrímsson
Innilegar samúðarkveðjur til ykkar allra ❤️
Ásbyrgissystkinin og fjölskyldur þeirra.

[DEFAULT]

Þau eru orðin þó nokkur erfiðu skrifin og ritstíflurnar sem ég, lærður handritshöfundurinn, hef þurft að tækla í gegnum árin. Aldrei óraði mér þó fyrir því að þau allra sársaukafyllstu ættu eftir að koma í formi minningargreinar um þig, elsku Einar minn. Mikið gæfi ég fyrir að hafa aldrei fengið tilefni til þessara skrifa. Eflaust gæti ég endurritað þessa grein 1000 sinnum án þess að finna réttu orðin til þess að lýsa því hvaða þýðingu þú hefur fyrir mig eða hversu yndislegan mann þú hafðir að geyma.

Þetta átti að fara einhvern veginn allt, allt öðruvísi. Við fjölskyldan áttum að flytja heim núna í lok desember og dvelja í 6 mánuði. Þú hafðir flutt aftur heim frá Danmörku fyrir 7 árum síðan og Agla fylgdi svo á eftir 5 árum seinna. Þér fannst 'geðveikt' að við værum að koma loksins líka. Eftir að hafa ekki búið í sama landi í meira en 20 ár ætluðum við þvílíkt að vinna upp allar töpuðu samverustundirnar. Við höfðum nú reynt að hittast allavega einu sinni á ári en tíminn var alltaf alltof stuttur og því erfitt að spjalla í rólegheitunum um það sem raunverulega skipti máli. Það var helst þegar við stálumst til að hringja í hvort annað á vinnutíma að við komumst lengra en hvernig allir hefðu það.

En ég var ekki fyrr komin til Íslands og þú í frí til Kanaríeyja, að skammdegið dembdist yfir okkur þó í þínu tilfelli hafi það verið í óeiginlegri merkingu þess orðs. Öll plönin okkar um leikhúsferðir, göngutúra, spilakvöld, kaffi á Háaleitisbrautinni og langar samræður yfir bjór á e-u öldurhúsi bæjarins urðu allt í einu að engu. Á einu augnabliki varð brúðkaupið hennar Öglu systur í ágúst að síðasta skipti sem ég hitti þig. Og á meðan það er óbærilega sárt að hafa ekki fengið fleiri stundir með þér þá er ég líka óendanlega þakklát fyrir þessa síðustu lifandi minningu af þér: Brosandi, reifur og dansandi við mömmu. Nú þegar þú ert farinn á undan mér til Nangilima eru það minningarnar sem verða að koma í stað plananna okkar: Minningar um leikhúsferðir, göngutúra, spilakvöld, kaffi á Háaleitisbrautinni og langar samræður yfir bjór á hinum og þessum öldurhúsum Evrópu.

Minningar um að halda fyrir hvort öðru vöku, sofandi til fóta eða í sitthvorri kojunni, þar til mamma varð að finna uppá leik til þess að við sofnuðum. Um hvernig þú hlóst svo að mér þegar ég var komin yfir tvítugt áður en ég fattaði að keppnin á milli okkar um hver væri fljótari að sofna, var engin alvöru keppni. Minningar um gamnislagi uppí sófa þegar við vorum loks búin að lesa yfir okkur af Enid Blyton, Agöthu Christie eða Sval og Val. Minningar um kúreka-og indíánapleymó, Matchboxbílabrautir út á moldarhlaði fyrir aftan hús og fjögurra-blaða-smára-leit út í móa. Um stofnun Leynifélagsins Svörtu Handarinnar með Friðriki og Brynju. Minningar um kjánalæti og hlátursköst eins og þegar við vorum nýbúin að sjá Crocodile Dundee: Hvernig við frussuðum út úr okkur tannkreminu í hláturskasti yfir ímynduðum senum sem við bjuggum til um 'sveitalubbann í borginni' á meðan við burstuðum tennurnar inná gestaklósetti. Mikið fannst okkur við fyndin. Allar minningarnar í kringum borðstofuborðið, lærandi saman, teiknandi saman, spilandi saman. Um hvernig ég vann þig alltaf í Kleppara en þú rústaðir mér alltaf í skák.

Minningar um súkkulaðikökubakstur úr Matreiðslubók Mín og Mikka, banana dýfða ofan í kakódrullu a la Agla systir og þaulskipulagðar leitir að felunamminu hennar mömmu þegar okkur þótti of langt í næsta nammidag. Minningar um bíltúra með afa á Háó þar sem við fengum að standa og fíflast aftan í sendiferðabílnum hans á ferð. Um hvernig við héldumst í hendur í kringum jólatréð á jólaballinu í Kársnesskóla og vonuðumst til að Hurðaskellir kæmi. Minningar um byssó með Öglu stóru systur þegar hún tók sér pásu frá unglingaveikinni. Minningar um sumarbústaðaferðir, tjaldferðalög og fyrstu utanlandsferðina okkar. Um veiðiferðina með pabba þar sem við veiddum bara einhver síli og fyrrverandi nemandi pabba endaði á að gefa okkur fisk á grillið. Öll skiptin sem við héngum niðri hjá afa og ömmu og nældum okkur í kandís úr skápnum við hliðina á vaskinum eða í brenni úr skúffunni fyrir ofan. Minningar um Runway galla og strigaskó úr Hagkaup. Minningar um brennó, kýló og bannað-að-stíga-á-jörðu-eltingaleiki á löngum sumarkvöldum.

Minningar um einlæg, stór, blá augu, krullur og nagaðar neglur.

Elsku hjartans Einar minn. Einn daginn eigum við eftir að finna fyrir djúpu þakklæti fyrir að hafa þó fengið þennan tíma með þér því það eru þeir sem er úthlutað enn minni tíma með ástvinum sínum. Við eigum eftir að finna fyrir þakklæti fyrir að stærstur hluti ævi þinnar hafi verið fylltur ást og gleði en ekki áralöngum þjáningum. Og við eigum ævinlega eftir að vera þakklát fyrir hversu ofboðslega góðan mann þú hafðir að geyma því það eru þeir sem aldrei kynnast slíkri ljúfmennsku og hjartahlýju á ævi sinni.

Á meðan við hugum að sárum okkar, held ég áfram að skrifa niður allt sem ég man um þig svo Daníel, Ellen og Baldur megi seinna meir læra allt um bernskubrek föður síns og þann yndislega dreng sem hann var.

Einar, elsku vinur okkar er látinn. Í mikilli sorg og samkennd minnumst við þín kæri vinur. Við erum þakklát fyrir vinskapinn og þær góðu stundir sem að við áttum undanfarin ár.

Borups fjölskyldan okkar verður aldrei söm, en við munum ávallt halda heiðri þínum og minningu uppi. Við munum hugsa um og styrkja Karen, Daníel, Ellen, Baldur og alla fjölskylduna þína eins og við getum um ókomna tíð. 

Við kynntumst á Borups Alle í Kaupmannahöfn þar sem að við bjuggum á námsárum okkar flestra sem að vorum þar og eignuðumst þar þétt net af vinum sem að við köllum Borups fjölskylduna. Því sannarlega vorum við fjölskylda og stuðningsnet hvers annars á þessum árum, og erum enn. Við ólum upp börnin okkar saman sem að búa að því í dag með sterkum vinskap sín á milli og góðum minningum. Við eyddum ófáum stundum saman í garðinum með kaffi, í matarboðum, strandferðum, á föstudagskvöldum öll í hrúgu með pizzukvöld og Disney show fyrir krakkana. Þar kynntumst við þínum frábæra húmor og hvernig þú gast nálgast hinar ýmsu dönsku reglur frá skemmtilegu sjónahorni. Sem að svo seinna meir var svo gaman að fylgjast með í svörum þínum til notenda spilavefsins þíns. Það var alltaf tilhlökkunar efni þegar við hittumst að spyrja þig um nýjustu kommentin eða kvartanirnar sem að þú tókst svo skemmtilega á. Þú varst alveg ótrúlega hæfileikaríkur, hógvær og góður fjölskyldufaðir. Alltaf boðinn og búinn til þess að hjálpa til við flutninga eða að mála með hjartahlýjunni sem að einkenndi þig og Karen saman. 

Við erum þakklát fyrir þær mörgu góðu stundir sem að við áttum síðastliðin ár, ferðalögin, samveruna og skemmtunina, hlaupatúrana, sjósundsferðir og fleira. Síðasta kvöldið sem að við hittumst, partur af Borups fjölskyldunni, að halda okkar árlegu dönsku jól, var á nýja heimili ykkar Karenar og barnanna.  Þar tókum við lagið með þínu undirspili á rafmagnsgítarnum sem að þú smíðaðir, geri aðrir betur! - allt sem þú tókst þér fyrir hendur lék í höndunum á þér af yfirvegun og hæfileikum. Meira að segja þegar þú byrjaðir að hlaupa þá gast þú strax hlaupið manna hraðast og við áttum fullt í fangi með að halda í við þig. Það hefur verið heiður að fá að vera samferða ykkur Karen undanfarin ár og munum við ávallt heiðra minningu þína. 

Elsku vinur, þín ert sárt saknað. Hvíl í friði. 

Við munum gera okkar besta að styrkja fólkið þitt um ókomna tíð. 

Elsku Karen, Daníel, Ellen, Baldur, Hrefna, Egill, Agla, Alda og fjölskyldur við sendum okkar dýpstu samúðarkveðjur og styrk til ykkar allra. 

Í dag hefði ég brotið heilann um hvernig ég gæti komið inn einhvers konar skondnri 'Hitchhiker's Guide to the Galaxy' tilvitnun í afmæliskveðjuna þína. Ég hefði líklega endað með eitthvað frekar hallærislegt og margtuggið en þú hlegið samt sem áður, og við gert grín að ofnotuðum bröndurum. Ég vona þó innilega að þú hafir svarið þitt við 'life, the universe and everything', hvar sem þú nú ert á Vetrarbrautinni. Elska þig alltaf.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Einar Þór Egilsson

Andlátstilkynning

Útför

Aðstandendur

Þakkir

Frá litlu stóru systur

Farvel kæri vinur

23.08.2022