Útftörin fór fram í kyrrþey að ósk fjölskyldunnar 9. desember 2022 í Seltjarnarneskirkju.

Daníel Ágúst Agueda fæddist í Landspítalanum við Hringbraut að kvöldi þann 9. apríl 1990.

Hann ólst upp í Breiðholtinu fyrstu tvö árin með foreldrum sínum Drífu og Juan, þau slitu samvistum þegar Daníel var 2ja ára. Eftir það var hann að mestu í umsjá móður sinnar en átti alltaf fastar stundir með pabba sínum og náði að kynnast fjölskyldunni sinni á Spáni ásamt því að tala reiprennandi spænsku.

Það hefur aldrei verið langt í grín og gleði í kringum Daníel, allt frá því að hann var lítill snáði og alveg fram á síðasta dag. Hann elskaði það að hrekkja systkini sín og það þurfti lítið að hafa fyrir því að hrekkja hann því að það var stutt í að honum bregði.

Daníel var 12 ára þegar móðir hans gaf honum sinn fyrsta gítar og var hann mjög snöggur að pikka upp grip og finna leiðir til að læra lög á gítarinn. Allt frá þeim tíma hefur gítarinn verið við höndina og hann alltaf tilbúinn að spila og syngja fyrir fólkið sitt. Hann hefur samið ótal mörg lög og texta og var lengst af að gutla í hljómsveitum í frístundum sínum.

Hann leit upp til pabba síns og afa Halla sem lést árið 2009, voru þessir tveir menn þeir sem Daníel vildi móta sig eftir og ná því besta frá þeim báðum. Í æsku átti hann einstakt samband við Andreu frænku sína sem er 3 mánuðum eldri og voru þau á tímum eins og systkini. Betri bróður er varla hægt að finna og eru systkini hans búin að rifja upp margar stundir með honum og finnst það einstakt hversu geðgóður, blíður og skilningsríkur Daníel var ávallt. Aldrei sýndi hann þeim það að hann hefði ekki tíma fyrir þau eða væri ekki tilbúinn til að gera eitthvað fyrir þau, sem er vissulega dýrmætt að eiga í elsta bróður og því er missirinn þeirra enn meiri. Þrátt fyrir mikinn aldursmun var vinskapur þeirra mikill og Daníel áhugasamur um þeirra hugðarefni, studdi þau í þeim og tók þátt.

Hann byrjaði ungur í málaranámi en fann sig ekki þar, fór þá á vinnumarkaðinn í nokkur ár og kynnist ástinni sinni í vinnu hjá Special Tours í hvalaskoðun. Fljótlega eftir að Lea byrjaði að vinna með honum þar fór hann að ræða við stjúpmóður sína og móður um það hvernig hann ætti að nálgast hana og sýna henni að hann vilji meira en bara vera vinur eða samstarfsfélagi.

Þetta lýsir Daníel svo vel vegna þess að hann talaði um allt og átti ekki í neinum vandræðum með að koma með allt á borðið sama hversu lítilvægt eða stórt það var. Þarna vildi hann samt alls ekki klúðra neinu því að hann fann hversu mikilvæg hún varð honum og hvað ástin greip hann föstum tökum.

Það var svo ári seinna eða 2019, sem frumburðinn Fjölnir fæddist og þá sáu það allir sem Daníel þekktu hversu frábær pabbi hann var og einstaklega blíður og umburðalyndur sambýlismaður. Það fór ekki fram hjá neinum sem þau Leu umgekkst að þau voru ástfangin og sáu ekki sólina fyrir hvoru öðru. Fjölnir var einstkalega blítt og þægilegt ungabarn og voru þau dugleg að heimsækja fjölskylduna hennar Leu í Þýskalandi, einnig hefur fjölskyldan frá Þýskalandi margsinnis komið til Íslands til að taka þátt í stórum stundum í lífi fjölskyldunnar.

Árið 2021 fæddist þeim annar gullfallegur drengur hann Hlynur, sem var frá 8 mánaða til 15 mánaða aldurs með pabba sínum í fæðingarorlofi og var það afskaplega dýrmætur tími fyrir þá feðga að eiga saman. Daníel fór aftur af stað í skólann og í húsasmíðanám, sem átti vel við hann og átti ekki mikið eftir til að ljúka því og eitt það síðasta sem hann gerði var að klára taflborð, sem hann skilur eftir fyrir syni sína.

Daníel var mjög stoltur af fólkinu sínu og enn stoltari af sonum sínum sem áttu hug hans og hjarta ásamt Leu sinni. Með sorg í hjarta kveðjum við yndislega Daníel okkar og munum leggja allt okkar í að heiðra minningu hans um aldur og ævi ásamt því að styðja synina og barnsmóður í gegnum erfiða tíma og um alla framtíð.

Með ást og söknuði, Drífa mamma, Sólrún og Adriana Eik

Við elskum þig meira en orð fá lýst!

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Daníel Ágúst Agueda

Útför

Þakkir

Ertu með minningargrein?