Elskulegi faðir, tengdafaðir. afi og langafi okkar, Bogi Guðmar Thorarensen, lést 19. desember 2021

Fjölskyldan þakkar fyrir samúðarkveðjur og hlýhug. Auk þess færir hún þakkir til séra Hennings og allra annarra sem að útförinni komu.

Þann 12. febrúar 1933 fæddist hjónunum Karólínu Maríu Guðjónsdóttur og Eyvindi Jóni Thorarensen drengur. Hann fékk nafnið Bogi Guðmar. Fyrir áttu þau dótturina Erlu. Hálfsystir þeirra og elst í hópnum var María Sigurðardóttir. Þegar Bogi kom í heiminn bjó fjölskyldan í bakhúsi við Laugarveg og kreppa ríkti á Íslandi. Ástandið var mjög alvarlegt og afkoma fólks mjög ótrygg. Þegar hann er sjö ára deyr móðir hans og  Bogi er kominn í fóstur vestur í Dalasýslu að Heinabergi á Skarðsströnd. Það var alþekkt á þessum tíma að börn voru rifin upp með rótum og fjölskyldur leystar upp. Að Heinabergi tók ömmusystir hans að sér. Hún hét Steinunn Jakobína Guðmundsdóttir og maður hennar var Steingrímur Samúelsson. Á bænum voru sjö börn og tveir fóstursynir. Hann sótti í æsku nám að Kjarlaksvöllum, var í farskóla og stóð sig vel í að læra fyrir ferminguna.  

Hann fer í vinnumennsku að Kjarlaksvöllum þegar hann er 17 ára. Þegar fósturforeldrar hans bregða búi á Heinabergi þarf Bogi að fara að vinna fyrir sér. Þá fer hann að vinna í Stórholti. Páll í Stórholti ræður hann þá sem vinnumann. Bogi vann hjá honum í tvö ár og talaði vel um Pál og tímann í Stórholti. Þessi dvöl átti eftir að hafa afdrifarík áhrif því hann kynntist heimasætunni á næsta bæ, Lilju Láru Sæmundsdóttur, og felldu þau hugi saman. Þau giftu sig árið 1954. Þau hófu búskap sinn í Reykjavík og eignuðust þar sitt fyrsta barn. Börnin áttu eftir að verða níu talsins. Þau fluttu síðan vestur að Neðri-Brunná þar sem þau eignuðust sitt annað barn árið 1957. Síðan var komið við að Neðri-Brekku, þar sem þau eignuðust sitt þriðja barn, og árið 1960 fluttu þau að Heinabergi á Skarðsströnd. Þau eignuðust þar sex börn á árunum 1960-1968. Þar héldu þau heimili og stunduðu búskap í tólf ár en þá fluttu þau í Garðabæinn þar sem þau áttu eftir að búa ævina á enda. Bogi á 50 afkomendur og eru 47 þeirra enn á lífi. Barnabörnin eru 23 og banabarnabörnin 18 talsins.  

Eftir að þau sneru aftur úr sveitinni vann Bogi hjá Esso. Þar var vinnudagurinn langur. Hann var farinn á morgnana áður en krakkarnir fóru á fætur og kom heim um kl. 10 á kvöldin og voru sum börnin þá sofnuð. Árið 1980 byrjaði hann að vinna sem húsvörður í Garðaskóla. Þar átti hann eftir að starfa í 20 ár. 

Ævi Boga mótaðist af talverðum áföllum. Fyrst í æsku og síðan átti hann eftir að upplifa að missa þau sem stóðu honum næst. Hann lagði alla tíð hart að sér og gekk á sjálfan sig. Hann barðist við mikla bakverki og 36 ára fær hann gigt. Árið 1995 fékk hann heilablóðfall og lamaðist á annari hlið líkamans og þurfti að fara í endurhæfingu á Reykjalund. Hann þurfti að takast á við mörg hjartaáföll og við krabbamein í brjósti. Allt þetta mótar einn mann.

Bogi og Lilja voru samtaka í að sjá fyrir þessum stóra barnahóp sínum og gekk það fyrir öllu. Hagsýni og ráðvendni í fyrirrúmi og ekki eytt um efni fram. Samband hans við Lilju var mikilvægt og hún studdi við hann á margvíslegan hátt. Hann einangraðist eftir að hún féll frá. Bogi var handlaginn og átti auðvelt með allt verklegt. Á seinni árum keypti hann sér rennibekk og eru ófáir hlutir sem afkomendur eiga eftir hann, auk þess sem hann fór á útskurðarnámskeið og skar út verk í tré.

Hann naut þess að fara vestur í Dalina eftir að hann komst á mölina. Hann naut sín við veiðar bæði á fugli og fiski. Hann fylgdist vel með fótbolta og fór oft á völlinn. Hann hafði skemmtilega kímnigáfu og gat oft verið stríðinn, en þó alltaf á besta máta. Hann fór aldrei of langt og las vel í allt fólkið sitt og vissi hvenær átti að hætta og hvenær mátti halda áfram. Hann þekkti allt sitt fólk vel og bar virðingu fyrir því. En hann var fyrst og fremst góðmenni, heiðarlegur, bóngóður, nægjusamur, ljúfur og hlýr. Ljúflyndi hans var eitthvað sem afkomendur hans könnuðust vel við. Augljóst var að honum þótti vænt um fólkið sitt. Hann vildi alltaf heyra af því og hvernig því gekk. Hann var stoltur af fólkinu sínu og gladdist þegar hann heyrði að þeim vegnaði vel. Bogi var ekki af þeirri kynslóð sem tjáði tilfiningar sínar en fólkið hann fann væntumþykjuna og ástina þegar hann faðmaði þau og eins greindu þau það í augum hans. 

Eftir að hafa búið víða í Garðabænum flytur Bogi á hjúkrunarheimilið Ísafold árið 2018. Endalokin báru brátt að. Hann vaknar viku fyrir andlátið og finnst eins og hann sé að lamast og er áberandi þvoglumæltur. Veikindin ágerast og Bogi skildi við 19. desember síðastliðinn. Minning um góðan mann lifir. Við felum hann Guði vonar og upprisu.     

Erla Hildur Jónsdóttir

Innilegar samúðarkveðjur. 
Erla Hildur Jónsdóttir
Jónas Jóhannesson

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Bogi Guðmar Thorarensen

Andlátstilkynning

Útför

Þakkir

Ertu með minningargrein?