Bjarni Kristján Elías Hansson lést mánudaginn 29. janúar síðastliðinn á Sjúkrahúsinu á Akranesi eftir stutta sjúkrahúslegu. 

Útförin verður frá Fella- og Hólakirkju

Bjarni Hansson lést mánudaginn 29. janúar síðastliðinn á Sjúkrahúsinu á Akranesi. Bjarni er frá Sætúni í Grunnavík í Jökulfjörðum. Þar fæddist hann 30. október árið 1928 og var skírður fullu nafni Bjarni Kristján Elías Hansson, en kunni aldrei við millinöfnin tvö og notaði þau ekki. Hann var sonur hjónanna Hans Elíasar Bjarnasonar og Jónínu Jónsdóttur. Hálfbróðir hans, samfeðra, var Hans Bjarnason (1923-1991)). Alsystkini Bjarna voru Hjálmfríður Guðrún Hansdóttir (1924-2006), Jón Sigurðsson Hansson (1926-1999), Ólafur Jón Hansson (1931-2013), Kristján Hansson (1934-1998) og Pétur Björn Hansson (1938-1969).

Tólf ára gamall fór Bjarni til séra Jónmundar Halldórssonar á Stað í Grunnavík, næsta bæ við Sætún, en foreldrar hans og systkini fluttu það ár til Hnífsdals.

Eina barn Bjarna er Rósa Guðrún Bjarnadóttir, f. 30. júlí 1945 í sjúkrahúsinu á Ísafirði, en móðir hennar var Sigrún Jóna Guðmundsdóttir, f. 1. september 1907 á Sandeyri á Snæfjallaströnd, d. 18. október 1978 í Reykjavík. Sigrún Jóna var vinnukona hjá séra Jónmundi á Stað. 

Þegar Rósa fæddist var Bjarni aðeins 16 ára gamall og það sama ár flutti hann til Hnífsdals. Samskipti þeirra feðgina voru jafnan stopul, nánast engin framan af en urðu meiri með árunum. 

Frá þriggja ára aldri ólst Rósa upp í Lyngholti í Snæfjallahreppi hjá hálfsystur móður sinnar, Salbjörgu Jóhannsdóttur  ljósmóður (1896-1991) og eiginmanni hennar, Ingvari Ásgeirssyni, bónda, trésmið og bókbindara (1886-1956).

Eiginmaður Rósu er Guðvarður Jónsson, f. á Þingeyri 18. desember 1924. Foreldrar hans voru Jón Erlendur Jónsson, f. 10. ágúst 1883, d. 28. júlí 1949, og Aðalheiður Soffía Bjarnadóttir, f. 31. júlí 1898, d. 27. janúar 1963.

Börn Rósu og Guðvarðar eru: 1) Jón Erlendur, f. 18. janúar 1962, 2) Heiðrún Kristín, f. 3. júlí 1965, maki Guðsteinn Bjarnason, f. 2. desember 1959, og 3) Jóhann Pétur, f. 13. apríl 1970, maki Birgit Raschhofer, f. 19. maí 1968.

Dætur Heiðrúnar Kristínar eru: 1) Kolbrún Soffía Arnfinnsdóttir, f. 28. júlí 1988, en hún er dóttir Arnfinns Róberts Einarssonar, f. 7. nóvember 1962, og 2) Steinunn Rós Guðsteinsdóttir, f. 20. apríl 1995. Maki Kolbrúnar Soffíu er Jóhann Heiðar Árnason, f. 12. maí 1983, og dætur þeirra eru 1) Salbjörg Sakura, sem fæddist andvana 11. nóvember 2018, 2) Heiðrún Birta, f. 4. desember 2020 og 3) Sandra Elísabet, f. 19. mars 2023.

Dóttir Jóhanns Péturs og Birgit er Anna Margrét Hjaltdal Jóhannsdóttir, f. 14. desember 2003.

Bjarni bjó stærstan hluta ævi sinnar á Kirkjubóli í Langadal þar sem hann var vinnumaður, fyrst hjá Steindóri Pálma Helgasyni bónda (1897-1967) og síðar hjá syni hans, Kristjáni Steindórssyni bónda og símstöðvarstjóra, f. 26. febrúar 1932, d. 15. febrúar 2020, og eiginkonu hans, Guðmundu Jónu Sigurðardóttur, f. 8. október 1939. 

Bjarni var kominn á Kirkjuból strax árið 1946 og var þar vinnumaður hjá Steindóri bónda árin 1946 til 1949. 

Eftir það flutti Bjarni suður til Keflavíkur, en þangað höfðu foreldrar hans flutt og vann Bjarni þar í frystihúsinu með pabba sínum og bróður.

Kristján sonur Steindórs réði Bjarna svo aftur til Kirkjubóls sem vinnumann árið 1957 og þar var hann fljótlega orðinn sem einn af fjölskyldunni. Börn þeirra Kristjáns og Guðmundu litu á hann nánast sem afa sinn, en þau eru 1) Steindór Gísli (f. 1958), 2) Kristín Margrét (f. 1963), maki Eyjólfur Eyjólfson, 3) Sigurður (f. 1967) , 4) Hafliði (f. 1970), maki Lilja Fossdal, dætur þeirra Karen Dís og Thelma Dögg, 5) Einar Rúnar (f. 1972), maki Rowena Riwera Kristjánsson.

Síðustu æviárin, eftir að Kristján og Guðmunda brugðu búi, dvaldist Bjarni á sumrin með þeim og börnum þeirra á Kirkjubóli en á veturna bjó hann í Reykjavík, fyrstu árin hjá Rósu og Guðvarði, einn vetur hjá Hafliða og Lilju og síðustu veturna hjá Jóhanni Pétri og fjölskyldu hans.

Undir lokin fór heilsu Bjarna hrakandi og úr varð að árið 2022 fór hann á hjúkrunarheimilið Brákarhlíð í Borgarnesi. Hann lést síðan sem fyrr segir á Akranesi eftir stutta sjúkrahúslegu þar.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Bjarni Hansson

Andlátstilkynning

Útför

Aðstandendur

Ertu með minningargrein?