Með djúpri sorg tilkynnum við að 
ástkær móðir okkar, tengdamóðir, amma,  langamma og langalangamma
Bjarndís Inga Albertsdóttir, (Baddý) lést í faðmi fjölskyldunnar 6.ágúst s.l.

Útförin fer fram í Bústaðakirkju í Reykjavík.

Bjarndís Inga fæddist og ólst upp í Bolungavík til 16 ára aldurs. Þar lauk hún almennri skólagöngu. Bjarndís bjó á Akureyri til 18 ára aldurs. Árið eftir bjó hún á Flateyri en flutti síðan til Reykjavíkur 1945. Hún kynntist manni sínum 1946 og hófu þau búskap ári síðar í Reykjavík. Bjarndís var heimavinnandi húsmóðir til ársins 1985 en þá hóf hún störf hjá Fönn hf. í Reykjavík. 

Eiginmaður Bjarndísar var Guðbrandur Rögnvaldsson en hann lést árið 2002, bílamálarameistari. Bjarndís og Guðbrandur eignuðust sjö börn. Þau eru: Heiðar en hann lést árið 2000, kvæntur Maríu Mundu Kristófersdóttur og eiga þau 3 syni en fyrir átti Heiðar einn son. Alda, maðurinn hennar er Magnús Jóhannsson og eiga þau 4 dætur. Albert Ómar og á hann 5 börn. Sævar, kvæntur Svölu Björgvinsdóttur og eiga þau 2 börn. Steinunn og á hún 4 börn. Haraldur, kvæntur Esteri Ósk Traustadóttur en samanlagt eiga þau 6 börn og Rögnvaldur og á hann 4 börn. 

Foreldrar Bjarndísar voru Albert Guðmundur Þorgeir Jóhannes Magnússon og Vigdís Benediktsdóttir. Alsystir Bjarndísar var Margrét Albertsdóttir, hálfsystir Barndísar sammæðra er Snjáfríður M.S. Árnadóttir og uppeldisbróðir Bjarndísar var Haraldur Olgeirsson. 

Bjarndís eða Baddý eins og hún var alltaf kölluð og Guðbrandur hófu búskap sinn á Haðarstíg 15 hjá foreldrum Guðbrands en fluttu svo í Garðsenda 9 árið 1956 og bjó stórfjölskylda Baddýjar í því húsi. Fluttust þau svo á Réttarholtsveginn í kringum 1990 og bjuggu þar í nokkur ár þangað til þau fluttust í Trönuhjalla í Kópavogi. 

Baddý var einstaklega góð kona og falleg sál. Hún tók alltaf hlýlega á móti öllum, átti alltaf eitthvað gott með kaffinu og var því mikið um gesti á heimilinu. Hún var þekkt fyrir að baka og elda eitthvað gott og oftar en ekki var rjómaterta eða grétukaka bökuð, marmarakaka, kleinur, ástarpungar eða vöfflur. Vöfflurnar hennar voru bestar og setti hún sykur í rjómann þegar hún þeytti hann. Baddý var alltaf til í að aðstoða fólk eftir bestu getu og átti hún það til að sauma og prjóna fyrir vini barna og jafnvel barnabarna sinna. Hún tók virkan þátt í Bolvíkingafélaginu en þó að Baddý hafi búið á höfuðborgarsvæðinu meirihluta ævinnar kallaði hún Bolungarvík alltaf heim. Hún tók einnig þátt í  eldri borgarastarfi Hjallakirkju þegar hún bjó á Trönuhjallanum. Henni þótti gaman að ferðast bæði innanlands sem erlendis og fanns henni gaman að hitta fólk. Hún var elskuð af öllum sem kynntust henni. Afkomendur og tengdabörn Baddýjar eru 109 talsins og var hún því ríkari en margir. Fyrir mörgum árum þegar Ólympíuleikarnir voru sýndir í sjónvarpinu hringdi Baddý í RÚV til að kvarta, en hún var nú ekki þekkt fyrir að kvarta mikið, en þarna fannst henni of langt gengið þegar þeir felldu niður uppáhalds sjónvarps þáttinn hennar Leiðarljós fyrir íþróttir, þó að hún hafi haft gaman af handboltanum og blótaði eins og sjóari þegar spenna færðist í leikinn en annars heyrði maður hana aldrei blóta. Hún talaði aldrei illa um fólk og þótti vænt um alla í kringum sig. Fólki leið vel í kringum hana og man maður eftir henni í eldhúsinu að dúlla eitthvað við matseld eða bakstur raulandi með útvarpinu. Fiskibollurnar hennar eru enn þekktar fyrir að vera bestu fiskibollurnar. Hún naut þess alltaf að hafa barnabörnin sín í kringum sig og voru þau ófá sem gistu hjá henni hvar sem hún bjó og einhver hafa meira að segja fengið að búa hjá henni oft þegar þau voru við skóla en afkomendur Baddýjar voru og eru á víð og dreif um landið. Í gegnum tíðina áttu Baddý og Guggi páfagauka sem þau höfðu gaman af. Þau höfðu líka gaman af því að fara í ferðalög um landið með hjólhýsið sitt en það var oft í langtímastæði á Húsafelli og var þá farið þangað flest allar helgar á sumrin og oft fengu barnabörnin að fara með. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Bjarndís Inga Albertsdóttir

Andlátstilkynning

Útför

Aðstandendur

Ertu með minningargrein?