Baldvin Rúnarsson fæddist á Akureyri 15.janúar 1994 hann lést að heimili sínu þann 31.maí 2019 eftir rúmlega fimm ára baráttu við krabbamein.

Foreldrar Baldvins eru Ragnheiður Jakobsdóttir framkvæmdastjóri f. 28.10.1968 og Rúnar Hermannsson vélfræðingur f. 17.06.1968. Bróðir Baldvins er Hermann Helgi f. 02.08.2000. ForeldrarRagnheiðareru Jakob Kristinsson f. 15.03.1945 d. 29.06.2010 og Jóhanna Maríanna Antonsdóttir f. 30.04.1946. Foreldrar Rúnars eru Hermann Jónsson f. 17.10.1939 og Helga Hilmarsdóttir f. 03.11.1948 d. 19.01.2000.

Baldvin hóf skólagöngu sína í Odderyarskóla á Akureyri fyrstu 3 skólaárin og flutti síðan yfir Gleránna og var í Glerárskóla frá 2003 - 2010. Baldvin lauk stúdentsprófi frá Menntaskólanum á Akureyri vorið 2014. Baldvin stundaði háskólanám í Auburn University of Montgomery, Alabama USA og í Esbjerg Business Academy í Danmörku, en þurfti frá að hverfa heim til Íslands úr báðum skólum vegna veikinda sinna.

Baldvin var mikil áhugamaður um fótbolta og harður Þórsari. Hann spilaði fótbolta með Þór Akureyri frá sjö ára aldri til tvítugs. Baldvin spilaði knattspyrnu með þá þriðju deildar liði Magna Grenivík hluta úr sumri 2014.

Allt frá unglingsárum til mars 2019 þjálfaði hann yngri flokka Þórs í knattspyrnu. Baldvin var mikill félagsmaður síns félags og vann mikið og óeigingjarnt sjálfboðastarf fyrir félagið allt fram til síðasta dags.

Útför Baldvins fór fram frá Akureyrarkirkju miðvikudaginn 12.júní kl 13:30

[DEFAULT]

Elsku besti Baldvin okkar hefur farið í ferðalagið langa sem bíður okkar allra, allt of snemma. Það er svo óraunverulegt að eiga ekki eftir að heyra fallegu ljúfu röddina hans aftur og fá knús frá honum.

Mottóin hans lífinu voru einföld „Gerðu það sem þér þykir skemmtilegt sama hvað öðrum finnst“ og „stressaðu þig ekki á hlutum sem þú færð engu um ráðið“.

Með þetta að leiðarljósi voru uppátækin mörg og sum þeirra fengu okkur foreldrana til að svitna, en í dag eru skemmtilegar minningar.

Veikindin sem poppuðu upp hjá honum fyrir rúmlega fimm árum, þá á fjórða ári í menntaskóla, lét hann ekki stoppa sig, kallaði þau smá hraðahindrun. Hann tæklaði þau á einstakan hátt, vildi enga vorkunn og ætlaði ekki að láta þau marka líf sitt. Þetta tókst honum á einstakan hátt með miklu æðruleysi og hélt gleðinni áfram í lífinu.

Litla fjölskyldan, mamman með strákana sína þrjá, höfum verið samheldin og dugleg að vera saman og þakklát fyrir hverja mínútu. Ferðirnar okkar núna síðustu ár, Malta, London, siglingin um Karíbahafið, New York, EM í París, Rostov í Rússlandi og Þjóðhátíð í Eyjum, eru svo dýrmætar í minningabankanum okkar.

Takk Baldvin fyrir að vera þú, ákveðinn, ljúfur, skemmtilegur, hvatvís, kurteis, hugrakkur, æðrulaus, hreinskilinn og svona getum við endalaust talið upp.

Takk fyrir komuna, elsku besti Baldvin okkar.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Baldvin Rúnarsson

Útför

Frá mömmu og pabba