Elsku pabbi okkar, tengdarfaðir, afi og langafi, Baldur Hannesson til heimilis í  Fururgerði 1, Reykjavík lést á Landspítalanum mánudaginn 20.júní 2022.   

Að lýsa Baldri í fáum orðum er erfitt því hann var mikil og litrík persóna.  Hann var ávallt á undan sinni samtíð, var athafnamaður og vann alla sína tíð sjálfstætt og þá annaðhvort með eigið fyrirtæki eða sem verktaki.  Hann var vélvirki að mennt og helgaði sinn starfsvettvang uppfinningum og frumkvöðlastarfsemi.  Hann vann mest við að teikna, hanna og smíða vélar og tæki, til iðnaðar og þá mest til áliðnaðarins.  

Hann tók við fyrirtæki föður síns, Fínpússningu , og rak það í nokkur ár, hann stofnaði grillkola verksmiðju og rak í nokkur ár, hann hannaði og smíðaði tvöfaldan torfbæ rétt fyrir utan bæinn, og svona væri lengi hægt að telja.  Atorkan, vinnugleðin og hugmyndaflugið hjá Baldri var óþrótandi alla hans ævi, alveg fram á hans síðasta dag.   

Baldur ferðaðist um allan heim á sinni ævi.  Hann vann í Svíþjóð í nokkur ár þar sem hann bjó ásamt konu sinni og 2 elstu börnum.  Hann ferðaðist mikið til landa í asíu og dvaldist reglulega, mánuðum og jafnvel árum saman, í Tælandi.  Hann var alltaf í ævintýraför, ef ekki í líkama að þá í huga. 

Baldur glímdi þó við parkinson í tvo áratugi og síðustu 10 ár var sjúkdómurinn hægt og rólega að taka yfir hans líkama og huga.  En hann barðist eins og ljón við sjúkdóminn og gerði allt í hans valdi til að vera sjálfbjarga og virkur í lífinu.  Stundum þótti börnunum hans nóg um þessa sjálfstæðis baráttu hans, í því ástandi sem hann var, og var þetta ferli því orðið börnunum hans, mjög þungbært síðustu árin.  En hann lifði eins og hann vildi og hann fór eins og hann vildi og það er líka virðingavert.  


Baldur Hannesson fæddist 5.október 1946 og lést 20.júní 2022.  Baldur lætur eftir sig 5 börn, en þau eru:

-Hlynur Baldursson fæddur 1966.  Maki Hlyns er Anna Kristín Gústafsdóttir og börn þeirra eru Birna Íris Hlynsdóttir, Máni Hlynsson og Sól.  

-Lilja Björk Baldursdóttir fædd 1971.  Maki Lilju er Stefán Guðmundsson og börn hennar eru Karen Ösp Einarsdóttir, Tinna Marín Norðdahl, Kristel Lind Norðdahl og Jökull Logi Norðdahl.  

-Reynir Baldursson fæddur 1974.  Maki Reynirs er Gladys Mera Munoz og börn þeirra eru Adrian Reynisson og Soffía Reynisdóttir.  

-Angelee Baldursdóttir búsett í Tælandi?.  Maki hennar er Leon Nelson og börn þeirra eru 2.  

Barnabörn Baldurs eru 11 og barnabarnabörn eru 4.

Foreldrar Baldurs voru Hannes Ágústsson (f. 11. nóvember 1912, d. 15. nóvember 1996) Sigurlaug Jónsdóttir (f. 14. sslfeptember 1915, d. 6. ágúst 2010) -Hannes fæddist að Gunnsteinsstöðum í Langadal (Húnavatnssýslu) en ólst upp hjá frænda sínum í Syðra-Tungukoti í Blöndudal sem nú heitir Brúarhlíð. Kvæntist Sigurlaugu 1941. Stofnaði og rak um áratugaskeið fyrirtækið Fínpússningu eða fram yfir sjötugt, en þá tók Baldur sonur hans við fyrirtækinu. -Sigurlaug fæddist í Bollakoti í Fljótshlíð. Fór að heiman 15 ára gömul til Vestmannaeyja í innanhússvinnu og kom ekki heim aftur til að vera. Eftir Vestmannaeyjadvölina fór hún til Reykjavikur og vann ýmis störf. 

Systir Baldurs var Ásdís Hannesdóttir fædd 1941, látin 2021 og var hún gift Gunnari I. Waage. Börn þeirra eru  Benedikt G. Waage, Davíð G. Waage. 

Baldur var afar náin mömmu sinni og það var honum þungbært þegar hún féll frá árið 2010.  Hann átti líka einstakt samband við Ásdísi systur sína sem féll frá árið 2021, og var hún oft í því hlutverki að siða bróður sinn til, sem þýddi ekki neitt, eins og gefur að skilja með hann Baldur.

[DEFAULT]

Með þessum örfáu orðum langar mig að minnast móðurbróður míns, Baldurs Hannessonar, sem kvaddi okkur núna í júní.  Þegar ég var lítill fannst mér alltaf nokkur ævintýraljómi í kringum hann, enda batt hann ekki bagga sína sömu hnútum og samferðamenn hans.  Ótalmörg dæmi væri hægt að tína til um það.  Hann var til dæmis einn af mínum fyrstu vinnuveitendum, þegar hann réð mig til vinnu í bragga inni á lóð álversins í Straumsvík.  Inn í braggann hafði hann smíðað öll þau tæki sem til þurfti til að framleiða grillkol og ég man enn hvað mér, unglingnum, þótti merkilegt að hann hafi tekið það upp hjá sjálfum sér að skella sér út í þann rekstur, enda fordæmin engin hér á landi og hann þurfti því að byggja allt upp frá grunni og afla sér þekkingarinnar.  

Það er ekki ofsögum sagt að vélar og tæki hafi alltaf leikið í höndunum á honum.  Og sér í lagi vélar sem hann smíðaði sjálfur.  Hann bjó nefnilega yfir frjóu ímyndunarafli og mikilli útsjónarsemi auk smíðahæfileika til að koma vélunum af teikniborðinu og í fullskapað tæki.  

Baldur tók við rekstri Fínpússningar í Dugguvogi þegar Hannes faðir hans lét af daglegum rekstri og rak fyrirtækið í sömu mynd allt þar til fyrirtækið var selt.  Hann var ekki búinn að vera þar lengi þegar honum hugkvæmdist að innrétta íbúð fyrir sig á efri hæðinni og áður en ég vissi af var hann fluttur inn.  Það lýsti honum ágætlega, enda framtakssamur með eindæmum og leiddist heldur ekki að synda aðeins á móti straumnum.  Annað dæmi um frumlegan húsakost var hans útfærsla af íslenskum torfbæ sem hann byggði í Lækjarbotnum í landi Kópavogs þar sem hann bjó í nokkur ár með konu og barni.

Síðustu árin var heilsan því miður ekki góð og var hann illa haldinn af Parkinson sjúkdómnum.  Hann lét það þó ekki stoppa sig í að fljúga reglulega á milli Íslands og Taílands, en óhætt er að segja að hann hafi tekið ástfóstri við það fjarlæga land og dvaldist hann þar langdvölum síðari hluta ævinnar.  Líklega var útbreiðsla Covid farsóttarinnar helsta ástæða þess að hann varði síðustu árum lífs síns hér á landi en ekki úti í Taílandi þar sem hugurinn dvaldi löngum stundum.  

Ég vona innilega að hann hafi nú fundið frið í sálu sinni og sendi börnum hans, vinum og ættingjum mínar innilegustu samúðarkveðjur.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Baldur Hannesson

Andlátstilkynning

Útför

Aðstandendur

Kveðja frá systursyni