Atli Viðar Jóhannesson fæddist á Akureyri  30 ágúst 1941. Hann lést á sjúkrahúsinu á Akureyri 16. júlí 2021.

Foreldrar Atla voru Dagmar Jóhannesdóttir frá Akureyri f. 10. nóv 1911 d. 17. Júní 2006 og Skarphéðinn Jónasson bifreiðastjóri frá Húsavík f. 11. Jan 1917 d. 28. Des 1990 , Atli var einkabarn Dagmar en samfeðra átti Atli stórar systkinahóp. 

26. maí 1969 giftist Atli Viðar eftirlifandi eiginkonu sinni Bennu Stefaníu Rósantsdóttir fædd 1. febrúar 1947 frá Ási á Þelamörk, dóttir hjónanna  Rósants Sigvaldasonar og Sigrúnar Jensdóttur.

 Atli og Benna eignuðust fjórar dætur; 1)Dagmar Ósk Atladóttir fædd árið 1969, gift Halldóri Walter Stefánssyni og saman eiga þau tvö börn, a)Katrín Mjödd fædd 1991. b)Hrannar Snær fæddur 1997. 2) Inga Sigrún Atladóttir fædd árið 1972, gift Jóni Ísfjörð Aðalsteinssyni, börn hennar eru a) Dagbjört Katrín Jónsdóttir, maki Erlingur Viðarsson og aman eiga þau tvö börn, Viðar fæddur 2016 og Ingu Völu fædd 2019. b) Guðjón Armand Ericksson fæddur 2001. c) Markús Ingi Ericksson fæddur 2007. 3) Kristjana Atladóttir fædd 1975, gift Brynjari Erni Arnarsyni, börn hennar eru Atli Dagur fæddur 1995, maki Hjördís Þöll Jóhannsdóttir og saman eiga þau tvö börn Sigurð Hendrik fæddur 2017 og Emelíu Voney fædd 2019. B) Benna Sóley fædd 2001, maki Matt Ferencik c) Olga Snærós fædd 2003 og d) barn þeirra Mikael Þór fæddur 2016. 4) Júlía Rós Atladóttir fædd árið 1976, Júlía er gift Hermanni Björnssyni og eiga þau fjögur börn Hólmfríður fædd árið 2003, Björn Hermann fæddur 2004, Friðgeir fæddur árið 2008 og Berglind fædd árið 2010. 

Atli Viðar ólst upp hjá móður sinni, afa og ömmu Gránufélagsgötunni á Eyrinni á Akureyri. Hann gekk í barnaskólann á Akureyri og fór á sjó að loknum barnaskólanum. Hann var háseti á Svalbak og Harðbak frá Akureyri og einnig á Björgúlfi frá Dalvík. Árið 1974 flutti Atli og fjölskylda austur á Eskifjörð þar sem Atli sótti sjó. Hann var háseti á Hólmanesi, Hólmatindi og Haföldu. Árið 1984 hætti Atli til sjós, sótti matsmannsnámskeið hjá fiskvinnsluskólanum og starfaði sem fiskmatsmaður um árabil. Hann átti og starfaði við fiskvinnslufyrirtækið Skeleyri um hríð,  stofnaði fyrirtækið Atlavík sem sá um löndun og Atlavík-Sport sem flutti inn verðlaunagripi. Síðar stofnaði hann fyrirtækið Ásfisk sem flutti inn og seldi öngla og veiðarfæri fyrir strandveiðar og rak hann það til dánardags. Atli fór í sinn síðasta sölutúr austur á land í maí s.l.

Atli var mikill Þórsari. Hann var markmaður hjá Þór á yngri árum og stundaði sund og var sundmaður Akureyrar.  Hann var mikill stangveiðimaður og hafði mjög gaman af að grípa í spil. Spilaði Bridge, vist og Ólsen Ólsen oft í viku allt til síðasta dags.

[DEFAULT]

Elsku pabbi, þá er ferðinni okkar saman lokið. Ferðinni þar sem við systurnar biðum í bílnum á meðan þú varst að tala við einhverja kalla, ferðinni þar sem þú gafst börnunum okkar nammi þó þú mættir það ekki, ferðinni þar sem þú varst minn helsti stuðningsmaður og harðasti gagnrýnandi.

Ég er svo þakklát fyrir ferðina okkar, að fá að kynnast þér svo vel, að fá að vinna með þér í fyrirtækinu þínu og fygja þér síðasta spölinn í gegnum krabbameinsmeðferðina og fá að fylgja þér í gegnum gleði og sorg. 

Þú hefur kennt mér svo ótal margt, ekki vegna þess að við deildum lífsskoðunum heldur ferkar vegna þess að við vorum ósammála um flesta hluti. Hugsun þín var sprottin úr samfélagi og aðstæðum sem ég þurfi sem betur fer aldrei að kynnast en kynntist þeim í gegnum allar sögurnar þínar og hugarfarið þar sem aldrei var í boði að gefast upp, leggja árar í bát eða breyta settri stefnu.

Elsku pabbi þú vildir alltaf hafa alla fjölskylduna hjá þér, þú varst alltaf að bjóða okkur í kaffi og hringja í okkur. Þú varst svo stoltur af okkur elsku pabbi og þú varst svo stoltur af því hvað mamma var góð kona, hvað hún var mikil mamma og amma og hvað hún gat búið okkur öllum fallegt og gott heimili. Það voru einlægar tilfinningar og endalaus ást.

Elsku pabbi minn, ég hef alltaf fundið að þú elskaðir mig af öllu þínu stóra hjarta, það kenndi mér að alveg sama hvernig vindar lífsins blása þa er alltaf til heimahöfn þar sem ekkert vandamál er of stórt til að leysa það. Þú varst óþreytandi að hvetja okkur áfram og heimili þitt stóð alltaf opið hvernig sem á stóð.

Elsku pabbi minn, siðustu árin voru bæði þau bestu fyrir þig og þau erfiðustu. Þú naust þess að búa með fjölskyldunni og hafa mikil og góð samskipti við afkomendur þína, en þú varst ekki góður í að hætta að vinna, að glíma við veikindi og finna að starfsþrekið var minna en áður. En elsku pabbi þú misstir aldrei móðinn, þú varst búinn að panta þér utanlandsferðir, skipuleggja nýja landvinninga, þú vildir stækka fyrirtækið þitt, bæta þjónustuna, gera áætlanir um fjölskyldumót og veislu með öllum þínum stóra vinahóp.

En nú hefur dauðinn sigrað þig, það er óvænt og svo sannarlega ekki eitthvað sem þú ætlaðir þér. Þú varst sterkari en allir og gast aldrei hugsað þér að neitt gæti lagt þig að velli, en svona fór þetta nú að endingu.

Elsku elsku pabbi minn, þú varst mér svo mikils virði, þú varst krefandi samstarfsmaður en samt svo góður vinur. Þú skildir ekki alltaf hvernig ég vildi haga lífi mínu en þú studdir mig samt og hafðir trú á Ingu þinni alla daga.

Elsku pabbi nú ertu farin frá okkur, nú þurfum við að passa vel upp á gömlu þina og svo hittumst við aftur og höldum stóru vina og fjölskylduveisluna sem þú varst búin að undirbúa.

Elsku elsku pabbi minn, takk fyrir allt og Guð geymi þig þangað til við hittumst öll aftur.

Þegar ég var lítil kom ég á hverju sumri, hver jól og páska og og var hjá ykkur ömmu. Það var alltaf eins og að koma heim. Ég man að þú kallaðir mig brókalalla af því að þegar ég var barn vildi ég helst vera fáklædd og klæddi mig ekki fyrr en eftir hádegi, tilneydd. Þú hafðir ótakmarkaða þolinmæði fyrir sérviskunni í mér og ég man ekki eftir að þú hafir nokkru sinni skammað mig nema helst ef ég var að tala á meðan þú varst að hlusta á fréttir.

Það er erfitt að lýsa því hvernig nærveru þú hafðir. Ég var alltaf hangandi utan í ömmu og þú varst stundum að grínast í mér á meðan. Oft beið ég við gluggann og sá þig keyra upp hæðina og fylgdist með þér fara úr bláa vinnugallanum og setjast við eldhúsborðið. Þá vildirðu alltaf kaffi og oft færði ég þér það. Þú varst alltaf glaður ef ég færði þér kaffi og mig langaði svo oft að vera góð við þig. Í hádegismatnum sat ég við hliðina á þér og við hlustuðum á fréttirnar. Þú varst mjög fljótur að borða og amma sagði að væri eftir öll árin á sjónum.

Ég man þegar þú fórst með mig að veiða í fyrsta skipti, enginn hafði nokkru sinni farið með mig áður, það var í tjörninni á Reyðarfirði. Við stoppuðum oft á leiðinni og töluðum við alla sem við mættum, því að þú þekktir alla og hafðir um margt að spjalla. Svo settumst við niður saman og þú sýndir mér flotholtið og kenndir mér að þræða maðkinn á krókinn. Þú varst rólegur veiðimaður en varst fljótur að æsast allur upp ef flotholtið fór í kaf. Ég var svo stolt yfir því að þú vildir hafa mig með þér þennan dag. Þegar við gengum í átt að bílnum sýndir þú öllum sem við mættum stærsta fiskinn okkar og lýstir því hvernig ég hefði dregið hann inn.

Stundum varstu að sýna okkur krökkunum eitthvað inni í skrifstofuherberginu og ég mátti líka alltaf koma þangað inn þótt að þú værir að vinna. Það var gott að sitja hjá þér og hlusta á þig segja gamansögur í símann. Þú lifnaðir allur við þegar þú sagðir góðar sögur. Þegar ég varð stærri sagðirðu mér alla sögurnar frá því að þú varst krakki og ungur maður. Þetta voru hálfgerð ævintýri vegna þess að þú varst hvatvís og ákveðinn og fórst þínar eigin leiðir. Ég hugsaði oft um það hvað þú hefðir verið hugrakkur og sterkur. Nú vildi ég óska þess að ég gæti fengið að heyra þessar sögur einu sinni enn.

Þú sagðir mér að afi þinn hefði ekki verið blíður maður, en þú lést hann ekki brjóta þig niður og heldur hélst þínu striki. Ef eitthvað var að hjá mér hugsaði ég oft um þig og að þú hefðir lent í alskonar aðstæðum og erfiðleikum en einn og sjálfur þá fannstu ömmu og skapaðir þér þína eigin fjölskyldu og gott líf fyrir börnin þín og barnabörnin. Nú þegar ég á sjálf börn ætla ég að gera eins og þú og leggja hart af mér fyrir þau. Erlingur segir að við séum svo lík í okkur, þó að það sé ekki augljóst, og það vona ég að sé satt.

Ég fæ aldrei lýst öllum stundunum okkar saman og hversu mikils virði þú varst mér. Takk fyrir að elska mig og börnin mín. Viðar og Inga Vala og Erlingur biðja að heilsa þér.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Atli Viðar Jóhannesson

Útför

Frá Ingu þinni

Frá Dagbjörtu Katrínu

Frá Bennu