Ásta Þuríður Guðmundsdóttir var fædd 22 nóvember 1941. Hún lést að morgni Hvítasunnudags 28 maí 2023. 

Ásta Þuríður fæddist að Hofsvallagötu 22 í Reykjavík þar sem hún ólst upp. Hún var ein af tíu systkinum, sjöunda í röðinni. Hún var dóttir hjónanna Guðmundar Kr.H.Jósepssonar bifreiðastjóra í Reykjavík og Guðmundu Vilhjálmsdóttur frá Vinaminni Eyrarbakka. 

Ásta giftist Baldri Skaftasyni 31.desember 1960. Þau eignuðust 4 börn. Guðmundur Kristinn fæddur 1959. Maki Margrét Erlendsdóttir. Börn: Baldur Kristinn f.1980, Erlendur Óli f.1984, Haukur Már f.1985. Sara f.d 1996 og Andri Freyr f.1997. Guðmundur og Margrét eiga 3 barnabörn.

Skafti Baldur f.1962. Maki: Þórdís Óladóttir. Börn: Ástrós Ósk 1993, Ásta Valgerður og Óli Þór f.1995. Skafti og Dísa eiga 1 barnabarn.

Ásta Dagbjört f.1968. Maki Haukur Óskarsson. Börn: Hákon og Ísak f.d. 2005. Gabríel f. 2007.

[DEFAULT]

Mig langar að minnast mömmu minnar sem var mér svo mikils virði. 

Elsku mamma mín og besta vinkona, nú er ár síðan þú fórst í sumarlandið.

Það var og er mikið högg og áfall að missa þig elsku mamma. Ég á ekkert nema yndislegar minningar um þig sem ég get hlýjað mér við og mikið afskaplega sakna ég þín elsku mamma. Það er svo mikill tómleiki og dagarnir líða einhvernveginn áfram. Síðastliðið ár er búið að vera mjög skrítið og virkilega erfitt og er enn. Ég veit ekki enn hvernig ég á að takast á við restina af lífinu án þín. Þú stóðst eins og klettur við hliðina á mér þegar ég gekk í gegnum mikið áfall og án þín hefði ég ekki komist áfram í lífinu. Þú varst og ert kletturinn minn. Ég veit að þú fylgir mér og verður mér ávallt við hlið. Þú varst sú sem við leituðum mikið til með alla hluti. Þú varst einstök manneskja, hjartahlý, hjálpsöm og elskuleg. Alltaf tilbúin að hjálpa ef eitthvað var. Ég er mjög lánsöm að hafa átt þig sem mömmu og fá að hafa þig svona lengi mér við hlið, mig langaði svo að hafa þig lengur, það var svo margt sem við ætluðum að gera saman. Ég gat leitað til þín með allt sem ég þurfti, þú varst alltaf með lausn eða ráð. Þú varst ekkert á því að fara héðan en því miður ráðum við ekki hvenær okkar tími kemur. Þú fékkst þinn skerf af veikindum síðustu 4 árin þín og það ferli var oft á tíðum erfitt og tók sinn skerf af lífsgæðum þínum. En það ferli tókst þú á með sönnum hetjuskap, æðruleysi, auðmýkt og bjartsýni, já það er aðdáunarvert hversu sterk þú varst í rauninni miðað við veikindi þín, við héldum alltaf í vonina að þetta myndi lagast, það var alltaf verið að gefa okkur von. Þú sagðir við mig að þig langaði svo að vera hérna áfram og fylgjast með okkur öllum, ég trúi því að þú gerir það á annað hátt núna. Allir bíltúrarnir okkar, kaffihús- og búðarápið og allt það sem við gerðum saman, þess sakna ég mikið. Að geta ekki komið og spjallað við þig um allt eins og við gerðum alltaf, það er líka mjög erfitt. Já,síðastliðið ár er búið að vera mjög erfitt og skrýtið, að geta ekki hringt í þig eða komið við hjá þér eða fá þig í heimsókn til mín er erfitt að sætta sig við, það er allt sem minnir á þig og það mun taka tíma að læra að lifa án þín. Við hittumst nánast á hverjum degi og hringdum margoft í hvor aðra á hverjum einasta degi, það er mjög erfitt og skrítið að geta það ekki lengur og ég stend sjálfa að því ennþá að ætla að hringja í þig út af einhverju en fatta svo að það er ekki hægt. Þú varst alltaf svo falleg, fallega klædd og fórst aldrei út úr húsi nema máluð og vel snyrt, enda alltaf kölluð Ásta Beauty. Þú varst mikil húsmóðir og hannyrðarkona, prjónaðir, heklaðir, saumaðir út, bútasaumur ásamt annarri handavinnu og ber heimilið ykkar pabba þess merki. Þú varst þekkt fyrir það þegar strákarnir voru litlir hvað þeir voru alltaf fínir og hreinir og heimilið ykkar fínt. Þú saumaðir og prjónaðir mikið föt á þá og þeir voru oft eins klæddir. Þegar ég kom þá var sama með mig, man t.d. eftir því að við vorum í eins vestum í afmæli. Þú hélst alltaf uppá afmælið þitt og voru borðið hlaðin glæsilegum veitingum, já þú kunnir sko að halda veislur. Ég er svo glöð yfir því að hafa getað séð um veisluna þína þegar þú varst 80 ára. Þú varst svo þakklát og talaðir oft um það hvað það hefði heppnast vel. Þú ljómaðir af gleði innan um fólkið þitt. Ég man svo vel þegar ég var lítil og þú varst að undirbúa veislurnar heima í Álftamýrinni og jólin. Þú varst mikið jólabarn og þegar ég var yngri þá leyfðir þú mér að taka þátt í jólabakstrinum og skreytingunum og það þótti mér spennandi. Þið pabbi voruð hjá mér á aðfangadagskvöld undanfarin 16 ár og síðustu jól voru engin jól því það vantaði þig við borðið. Já minningarnar eru margar og hef ég hugsað mikið um þær undanfarið ár. Ég hugsa um þig og til þín á hverjum degi. Þú varst alltaf til í sprell og stríðin varstu og þau eru ófá hlátursköstin sem við fengum saman, já það sem við gátum bullað og sprellað. 

Þú hafðir alltaf taugar í vesturbæinn enda fædd og alin þar upp. Það er ekki langt síðan ég fór með þig og þú gekkst um gamlar slóðir og í portinu heima eins og þú dagðir alltaf. Þér þótti afskaplega vænt um Kjósina, sveitina þína, og þar leið þér vel. Þar hafðir þú komið og verið síðan þú varst 5 ára. Síðustu árin gast þú ekki notið þess að vera þar sökum veikinda en alltaf varstu með hugan við Kjósina og talaðir mikið um hana. Margar góðar minningar sem við eigum þar. Þú varst öflug í félagslífi aldraðra undanfarin ár. Fórst í kirkjuna, félagsstarf og línudans tvisvar, stundum þrisvar sinnum í viku. Oftast keyrði ég þig á þessa staði og náði svo í þig þegar ég náði í Gabríel í skólann. Þú varst líka í Kvenfélagi Bústaðakirkju og tókst þátt í ýmsu þar. Þér þótti voða gaman að vera með í hannyrðasýningum og vera með sölubás fyrir jólin til styrktar ýmsum málefnum, þér þótti svo gaman að hitta fólk og spjalla, mikil félagsvera.Þér þótti afskaplega vænt um börn og styrktir ýmis samtök sem tengjast þeim. Ég gæti skrifað svo mikið um þig elsku mamma.......

Þú sagðist elska Elvis Presley og hélst mikið upp á hann. Þess vegna þótti mér við hæfi að hafa Elvis Presley lög við athöfnina þína ásamt öðrum lögum sem þú hafðir nefnt sjálf.  

Takk fyrir allt elsku mamma mín, allt sem þú kenndir mér og það sem þú skilur eftir. Ég hefði ekki getað beðið um betri mömmu og ég mun reyna að finna gleðina á ný til að heiðra minningu þína elsku mamma.

Elsku mamma var jarðsungin 5 júní 2023 í kyrrþey að hennar ósk. Kerið hennar var jarðsett 23 júní 2023 á afmælisdegi mínum. Ég bar kerið til grafar því fyrir 55 árum á þessum degi hélt hún á mér og gekk með mig fyrstu skrefin í fyrsta skipti, ég gekk með hana síðustu skrefin í síðasta skipti 55 árum síðar, það gefur mér mikið. Mamma er jarðsett við hliðina á drengjunum mínum en henni þótti sá staður alltaf svo fallegur og fór oft með mér að leiðinu þeirra. 

Ég elska þig mamma mín, mun alltaf hugsa til þín með hlýju og bera minningu þína í brjósti mér. Ég kveð þig elsku mamma með setningunni sem ég sagði alltaf við þig: "Ég elska þig, þú ert best."

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Ásta Þuríður Guðmundsdóttir

Útför

Mamma mín