Fædd 19 apríl 1907 – dáin 26 ágúst 1947.

Það er skrítið að vera að að skrifa um þig minningargrein um það bil 75 árum eftir að þú deyrð.

Það ætla ég samt að gera og þótt við höfum aldrei hist, þá finnst mér ég finna svo oft fyrir nærveru þinni og eftir að ég fór að rifja upp þína sögu þá hefur sambandið sem ég finn á milli okkar orðið sterkara með hverjum deginum. 

Mig hefði svo óskaplega mikið langað að hitta þig og setjast niður með þér eins og flestir gera með ömmum sínum og finna þessa ást og hlýju sem mér hafa sagt margir að þú hafir verið svo uppfull af. 

Sá dagur mun koma að við hittumst og þá veit ég að við munum sitja og spjalla, og ég er svo sannfærður um aðra tilveru að þessari lokinni að mig bara hlakkar til þeirrar stundar er við getum þrautalaust sameinað stóra barnahópinn þinn og afa Dúdda og farið yfir gengin spor.  

Ég hef með skrifum mínum verið að segja dætrum mínum þremur frá þér og það er svo gaman að sjá hvað þær hafa mikin áhuga á að fá að heyra frá langömmu Snjólaugu og hennar sögu. Ég veit að sú upprifjun sem ég hef verið að segja frá, svo sorgleg sem á stundum hún var, hefur kallað fram tár á hvarmi dætra minna þegar saga þín hefur verið sögð.

Ég hef séð þegar ég rifja upp þína sögu að hún var svo sannarlega þyrnum stráð og ég get með engu móti sett mig í þau spor er þú og afi þurftum að stíga, horfandi á eftir hverju barninu á fætur öðru í gröfina, og svo deyrð þú í blóma lífsins frá afa og tveimur sonum og dóttur sem syrgðu og söknuðu svo sannarlega. 

Þótt nú séu að verða 75 ár liðin frá andláti þínu hefur saga þín ekki gleymst og nú erum við afkomendur þínir að setja hana saman sem okkur er mest og best og þar með varðveita minninguna um ömmuna sem við áttum þótt við fengum ekki að njóta þinna miklu  mannkosta. 

Ég hef á undanförnum árum átt mjög oft leið að legstað þínum og ég trúi því að það vitir þú, og þær stundir er ég á við krossinn þinn eru oft án orða, en þeim mun meiri hugsanir og tilfinningar fara um huga minn  og finnst mér gott að heimsækja þig. 

Tilvera okkar afkomenda þinna og afa Dúdda er ykkur að þakka  og fyrir það viljum við þakka af heilum hug  með væntumþykju ykkur til handa, og um leið heita því að halda minningu ykkar beggja á lofti um langa framtíð. 

Elsku amma. Hafðu þökk fyrir allt og allt.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Anna Snjólaug Símonardóttir

Útför

Ertu með minningargrein?