Ástkær eiginkona mín, móðir okkar, tengdamóðir, amma og langamma lést í faðmi fjölskyldunnar þann 6. maí 2022.

Innilegar þakkir til starfsfólks gjörgæsludeildar SAk.

Sumarið 1962 fer mamma að heiman, þá búsett í Reykjavík, og héldu allir á heimilinu að hún væri að fara til sinnar vinnu. En flugmiða var búið að kaupa handa henni og kemur hún til Akureyrar aðeins með litla tösku og ástina í farteskinu og þar með byrjar ástarsaga þeirra mömmu og pabba sem varði í heil 60 ár.

Börnin urðu fimm og síðar komu barnabörnin fimmtán og barnabarnabörnin eru orðin sjö og heldur sú tala örugglega áfram að hækka.

Margar sögur væri hægt að segja frá og meðal annars sögur úr ferðalögum sem þau fóru í innanlands en erlendis fóru þau aldrei því Ísland er þeirra land. (nema kannski telst Grímsey til útlanda). Þau voru dugleg að ferðast öll sumur og hélt mamma góða skrá yfir alla vegi með því að strika á Íslandskortið þeirra góða.

Já mamma var alltaf dugleg að finna sér eitthvað að dunda við. Hún fann sér alltaf einhver verkefni eins og að mála og gera við, bæta og breyta. Hugmyndir hennar voru oft svo sniðugar og komu mörgum til að hlæja. 

Mamma hefur alltaf verið með græna fingur og gat komið öllum blómum til (nema blómið sem ég keypti mér í IKEA, engin töfrabrögð mömmu virkuðu þá), en já þennan hæfileika hélt hún fyrir sig eina - eða alla vega lét okkur systurnar ekki fá hann.

Ís í eftirrétt, það elskaði mamma. Enda ef þú komst í heimsókn í Lönguhlíð þá eru öll geymslu boxin allt saman ísbox. 

Smurbrauðs terturnar hennar þekkja allir þeir sem komu við og fengu sér kaffi og alltaf var eitthvað til að borða.

Já kaffið - uppáhaldsdrykkurinn hennar mömmu var kaffi, hennar elixír - ætli það megi ekki segja að hún hafi lifað á kaffi í 76 ár.

Mamma hugsaði fyrst og fremst um aðra og var það hennar ástríða að skoða á nytjamörkuðum eða útsölum og kaupa alls kyns varning sem hún svo gaf öðrum í fjölskyldunni eða nýtti til að fegra heimilið og garðinn.

Takk elsku mamma fyrir hugrekkið þitt, að stelast til Akureyrar að elta ástina, því án þín værum við ekki hér. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Anna Edda Gísladóttir

Andlátstilkynning

Útför

Aðstandendur

Þakkir

Ertu með minningargrein?