Ástkær eiginmaður minn, faðir okkar, tengdafaðir, afi og langafi, Andri Páll Sveinsson, lést á hjúkrunarheimilinu Hlíð þann 30. júní.  

Jarðsett verður frá Glerárkirkju 18. Júlí kl. 13.

Fjölskyldan þakkar auðsýndan hlýhug og vináttu. Einnig vill hún færa starfsfólki á Dvalarheimilinu Hlíð sérstakar þakkir fyrir einstaka umhyggju og umönnun. 

Andri Páll Sveinsson fæddist í Holti á Raufarhöfn þann 20. ágúst 1932 og ólst upp. Hann lést á Hjúkrunarheimilinu Hlíð þann 30. júní 2023. Foreldrar hans voru Sveinn Jósías Guðjónsson f. 1885 d. 1973 og Guðný Þórðardóttir f. 1899 d. 1993. Systur Andra voru: Sigurbjörg f. 1926 d. 2007; Helga Kristrún f. 1928  d. 1935; Sigrún Ólöf f. 1930 d. 2018;  Helga Karolína f. 1936 sem er nú á  hjúkrunarheimili í Reykjavík.
 Árið 1960 giftist hann Guðrúnu Sigurðardóttur  f. 9. janúar 1934. Fyrsta árið bjuggu þau í Reykjavík en fluttu svo til Akureyrar þar sem þau hafa búið síðan, flest árin í Langholti 13 sem hann byggði á einu ári. 
Börn Andra og Guðrúnar eru :
1.	Hólmdís Karlsdóttir f. 1954 maki Karl Kristinsson f. 1946. Sonur þeirra er Andri Rúnar f.1983
2. Sigríður Andradóttir f. 1957.  Börn Sigríðar eru Pálmi Þór  f. 1977 , Thelma Sif f. 1985  og Stefán Erling  f. 1986 d. 1991.
3. Stefán Jóhann f. 1959 d. 2002
Móðir Sigríðar og Stefáns er Oktavía Erla Stefánsdóttir f. 1938.
4. Sigfríð Andradóttir f. 1961 maki Þorkell Cýrusson f. 1961.  Börn þeirra eru Guðríður f. 1985 og Sigurður Sveinn f. 1991. 
5. Guðný Andradóttir f. 1963 maki Þröstur Sigurðsson f. 1963. Börn þeirra eru Ingvar Örn f. 1982, Lydía Ruth f. 1986,  Ólafur Sveinn f. 1987, Guðrún Jóna f. 1996,  Harpa Lind  f. 1998  
6.  Rúnar Helgi Andrason f. 1967 maki Margrét Eiríksdóttir f. 1983.
Börn þeirra eru Kristinn Páll f. 1995 Helga Margrét f. 1998, Heimir Már f. 2005, Davíð Már f. 2005, Bjartur Yngvi f. 2016

Andri var snemma liðtækur til vinnu,  fór á nokkrar vertíðir og vann við ýmislegt en komst svo á samning við að læra húsasmíði og vann við það fyrstu árin.  Árið 1972 bauðst honum starf sem húsvörður við nýbyggðan Glerárskóla og starfaði þar til 2001.  Það starf hentaði honum mjög vel, hann passaði að allt væri í lagi og virtist finna á sér ef eitthvað var að í skólanum. Hann hafði sérlega gott lag á að ná til drengja sem þóttu erfiðir í hegðun en þá fékk hann gjarnan með sér í lið og fékk þá til að aðstoða sig.  Einnig ráku þau hjónin rammagerð í bílskúrnum á Langholti 13 í tæp 25 ár.
Andri var í Sjóstangveiðifélagi Akureyrar frá stofnun þess.



[DEFAULT]

Elsku pabbi nú ertu búinn að fá hvíldina, farinn að hitta fjölskyldu og vini sem á undan eru gengin. Ég sé þig í anda núna tjúttandi við systur þínar því þú naust þín á dansgólfinu. Ég man alltaf þegar ég fór með þér 15 – 16 ára gömul á spilavist sem þú stjórnaðir fyrir hönd Þingeyingarfélagsins í gamla Alþýðuhúsinu (Allinn) sem endaði á harmoniku balli og hvað það var gaman að fara þarna með þér.

Þú hafðir ákveðnar reglur þegar maður var komin á unglingsárin og vildi fá að skreppa út með vinkonunum oftast á ball í Dynheimum, stundum bíó og/eða á rúntinn með vinkonunum og kærustunum þeirra sem voru komnir með bílpróf. Ég lærði fljótt hvernig var best fyrir mig að fá leyfi hjá þér, ég kom inn í stofu þar sem þú sast eftir kvöldmatinn að lesa blaðið eða horfa á fréttirnar í sjónvarpinu og spurði hvort ég mætti fara út með vinunum, hvert ég væri að fara og um hvaða leiti ég áætlaði að koma heim. Þar með varst þú búinn að fá að vita það sem þú þurftir og gafst mér leyfi.

Haustið 1978 (nýorðin 17) kynntist ég honum Kela mínum en við vorum í sama bekk í MA. Hann var fluttur inn nokkrum mánuðum seinna, rétt áður en hann fór vestur í jólafrí og  það var ekki að spyrja að því hjá ykkur mömmu, það var eins og hann hefði alltaf átt heima þarna og varð strax einn af fjölskyldunni. Fljótlega eftir áramótin kom ég inn í stofu og spurði um leyfi til að fara út og þá leistu á mig og spurðir í rólegheitum hvort mér fyndist ekki vera komin tími á að hætta þessu orðin þetta fullorðin. Eftir það bað ég ekki um leyfi meir, ja, nema þegar ég þurfti að fá bílinn lánaðan.

18 ára var ég flutt suður að læra rakarann og eftir það kom ég ekki til ykkar í Langholtið og síðar Lindasíðu nema gestkomandi en alltaf fagnaðir þú okkur með bros á vör, breiddir út faðminn og tókst fast utan um mig/okkur og hvað það var gott að koma ,,heim“ til ykkar mömmu. Og þegar við fórum aftur vestur sagðir þú alltaf við okkur  ,,farið varlega " en það voru síðustu orðin sem þú sagðir við mig. 

Þið mamma voruð dugleg að heimsækja okkur þessi ár sem við bjuggum á Hellissandi og munaði ekkert um að koma ef á þyrfti að halda. Þú komst og hjálpaðir til þegar við vorum að klæða húsið og ég tala ekki um að setja upp nýju eldhúsinnréttinguna. Við áttum margar góðar stundir þar í Munaðarhól 8, svo ég tali ekki um í Dagsbrún með Guggu og Cýra. Með þeim og ykkur mömmu tókst mikill og sterkur vinskapur sem fylgdi ykkur alla tíð.

Þú varst góður afi fyrir börnin mín Guðríði og Sigurð Svein þrátt fyrir að þau byggju langt í burtu og hafðir ekki eins mikið samneyti við þau og hin sem áttu heima á Akureyri. Þegar Guðríður kom norður til að fara í MA og var nóg um lætin á heimavistinni þá var lítið mál fyrir hana að hringja í ykkur mömmu og þú varst mættur til að ná í hana og leyfa henni að gista yfir helgina í rólegheitunum hjá ykkur.

Elsku pabbi! Farðu í friði og megi guð vera með þér

Elsku pabbi, nú ertu lagður af stað í þína hinstu ferð. Hjarta mitt er fullt af sorg og söknuði en um leið þakklæti fyrir allar þær stundir sem við áttum saman. Það eru forréttindi að hafa alist upp við föður sem var ávallt til staðar. Eins og klettur sem stendur af sér brimrót lífsins þó hann veðrist með árunum.

Þegar ég lít til baka get ég yljað mér á svo mörgum minningum. Minningarbrot birtast í huganum og varðveitast þar að eilífu. Þannig verðurðu ávallt hluti af mér. Sérstaklega eru dýrmætar minningar þar sem við vorum að bjástra saman úti á sjó, hvort sem við vorum að veiða til matar eða keppa í sjóstangaveiði. Það er dýrmætt að deila áhugamáli með foreldri sínu og var ég svo heppinn að þannig var með okkur.  

Nú held ég áfram þann vegspotta sem bíður mín. Vonandi næ ég að skila því áfram til minna barna sem þú gafst mér. Það er ærið verkefni en ég mun reyna. Ég veit að þú munt fylgja mér áfram og benda mér á þegar það á við. Í veikindum þínum síðasta árið má segja að þú hafir að einhverju leyti verið farinn, en eins og Bjartur Yngvi sonur minn sagði: “

Nú er afi kominn með nýjan heila og getur fylgst með

”.  Ég trúi að svo sé og veit að nú ertu á betri stað. 

Tengdapabbi, Andri Páll Sveinsson, er fallinn frá. 

Það er hlutskipti okkar allra að kveðja þennan heim á einhverjum tímapunkti og tími Andra Páls hér á jörð er liðinn. Andri Páll kom inn í líf mitt fyrir rúmum 40 árum, þegar ég fór að rugla reitum við dóttur hans Sigfríði, svo líf okkar hefur legið saman í ansi mörg ár og aldrei skyggt á hið góða samband sem á milli okkar hefur verið. Þegar við hittumst hvort sem það var í gegnum síma eða þegar við hittumst í persónu þá snerist umræðan oft um veðrið og hann þreyttist aldrei á að benda á hversu gott veðrið væri á Akureyri. Hann sagðist alltaf koma með góða veðrið til okkar hvar sem við áttum heima í það skiptið. Í minningunni þá var oft gott veður þegar hann og Guðrún komu til okkar hvort sem það var fyrir tilviljun eða hann hafði þetta vald yfir æðri máttarvöldum? 

Samband Andra Páls og Guðrúnar við foreldra mína, sem bæði eru fallin frá, var mjög gott og er ég þakklátur fyrir það. Pabbi og Andri voru á margan hátt líkir og gátu því rætt saman um mörg málefni hvort sem það voru málefni líðandi stundar eða hvernig lífið var í ,,gamla daga“.

Ég er þakklátur að fá að spila og syngja lag mitt, Legðu aftur augun, yfir honum og gefa honum það veganesti inn í ,,Sumarlandið“ þar sem hann hittir ættingja sína og vini sem nú eru fallin frá og ég veit að það verður tekið vel á móti honum.

Ég sendi öllum hugheilar kveðjur á þessari stundu sérstaklega þó eiginkonu Andra Páls, Guðrúnu Sigurðardóttur, börnum hans, tengdabörnum og afkomendum þeirra.

Takk kæri tengdapabbi fyrir allt og megi góður Guð geyma minninguna um góðan dreng.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Andri Páll Sveinsson

Andlátstilkynning

Útför

Aðstandendur

Þakkir

Kveðja frá Sigfríð

Kveðja til pabba

Kveðjur frá Kela