Ástkær eiginmaður minn, faðir okkar, tengdafaðir, afi og langafi lést á páskadagsmorgun 17. apríl 2022.

Útförin fer fram frá Kópavogskirkju.


Andrés Sigurðsson fæddist á Ólafsfirði 18.03.34

Foreldrar hans voru Sigurður Pétur Jónsson vélstjóri, f. 6.4. 1907, d. 3.10. 1980, og Freygerður Anna Þorsteinsdóttir, húsmóðir og afgreiðslukona, f. 15.2. 1912, d. 7.5. 1987. Systkini Andrésar eru Anton, f. 1932, Guðrún Árna, f. 9.11. 1935, d. 15.11. 1993, Sigríður Guðlaug  f. 11.1. 1937, d. 10.2. 2022, Jón, f. 1938, Þorsteinn Gunnar, f. 24.9. 1939, d. 11.8. 1940, Margrét Friðþóra, f. 1943, og Valgerður Kristjana, f. 1947.

Eiginkona Andrésar var Jensína Þórarinsdóttir fædd 3.10 1936. Þeirra börn eru Þórarinn Hólm kvæntur Rósu Bergmann Jónsdóttur, Sigríður Andrésdóttir, Linda Andrésdóttir kvænt Hafsteini Björgvinssyni og Þorsteinn Andrésson kvæntur Naluemon Seesan. 

Börn Þórarins eru Sindri Bergmann, sambýliskona Pálína Guðrún Sigurðardóttir, þeirra dætur eru Salóma Rósa og Salka Margrét. Andri Franklín, kvæntur Önnu Bertu Geirsdóttur, þeirra dætur eru Daley Myrra og Sara Júdea. Gígja Rós, hennar dóttir er Antonía Lind, sambýlismaður Sigurður Stefán Haraldsson og þeirra dóttir er Emma Sóllilja. Harpa Marín sambýlismaður Páll Steinar Sigurbjörnsson, þeirra sonur er Ísak Máni.

Dóttir Sigríðar er Sandra kvænt Christoffer Westerdahl.

Börn Lindu eru Kristín, hennar börn eru Lovísa Sól og Björgvin Snær, sambýlismaður er Friðjón Pálsson,  Hólmfríður, hennar dóttir er Freyja Kolbrá Nour, hennar sambýlismaður er Sigurbjörn Birgisson.

[DEFAULT]

Hann Afi Andrés var góður afi og ég á eftir að sakna hans mikið. Hann var trésmiður og eftir hann liggja fjölmörg verk um allt land, allt frá vönduðum húsgögnum upp í hús og flugskýli. Hann vandaði alltaf til verka og fannst skemmtilegast þegar tími gafst til þess að vanda sig extra mikið. Hann var traustur. Stóð alltaf við sitt og ég held að það sé hægt að telja þá daga sem hann var fjarverandi frá vinnu á fingrum annarar handar.

Hann vann lengst af við smíðar hjá Flugmálastjórn, var með aðstöðu í bragga. Það fannst mér kúl. Hann gat smíðað allt og var alltaf til í að hjálpa mér þegar ég leitaði til hans. Hátalarastandar, veggjaeinangrun, stúdíóveggir. Hvað sem er. Alltaf var hann til.

Ég á margar góðar minningar úr æsku af veiðiferðum, skíðaferðum og ferðalögum með afa. Í flestum þessara ferða, þó ekki væri mikil sól á himni, var afi kominn úr að ofan. Við minnstu sólarglætu reif hann sig úr köflóttri skyrtunni. Í minningum mínum er afi alltaf klæddur í köflótta skyrtu. Svona vinnuskyrtu. Og rjóminn. Við elskuðum rjóma. Við borðuðum mikið af rjóma. Enda var vel veitt af honum hjá ömmu og afa. Þar var gott að vera. Vöfflur, flatkökur og gott fólk.

Ég hafði mjög gaman að því að spyrja afa út í uppvaxtarárin á Ólafsfirði og fannst því mjög skemmtilegt þegar við fórum í dagsferð þangað þegar ég var krakki. Þar fékk ég að heyra margar skemmtilegar sögur. Hann sagði mér t.d. frá manninum sem var með svo stórar hendur að það skyggði á bæinn ef hann lyfti þeim upp. Hann sagði mér frá fyrsta bílnum sem hann sá og þegar hann, 10 ára, þurfti að elta símastaurana yfir heiðina til að komast heim til Ólafsfjarðar. Dagsferð. Það var smá misskilngur um hver átti að sækja hann. 

Svo spurði ég hann oft og mörgum sinnum út í söguna af því þegar hann hjólaði frá Reykjavík til Ólafsfjarðar á gíralausu hjóli á illförnum malarvegum. Það fannst mér aðdáunarvert og mikið þrekvirki. Afi var líka mjög fyndinn. Hann glotti alltaf út í annað þegar hann sagði mér að hann hefði fengið ókeypis snarl í þessari ævintýralegu hjólaferð. Hann brunaði niður brekku með galopinn muninn og inn í þétta mýþyrpingu. Hann brosti alltaf út í annað þegar hann lýsti viðbrögðum sínum við þessari óvæntu veislu. Ekta afasvipur.

Afi var mikl barnagæla. Alltaf með barn í fanginu og gaf þeim allan tímann í heiminum. Skoðið bara myndaalbúmin! Í síðasta samtalinu okkar talaði hann um það hve heppinn hann væri með fjölskylduna sína. Í kringum hann væri bara gott og strangheiðarlegt fólk. En þannig var afi einmit. Góður og strangheiðalegur.

Afi Andrés var traustur og skemmtilegur og fagmaður fram í fingurgóma. Ég var alltaf mjög stoltur af því að hann væri afi minn og mun sakna þess að heyra ekki fleiri sögur frá honum. En ég mun svo sannarlega segja mínum afkomendum sögurnar sem hann sagði mér.

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Andrés Sigurðsson

Andlátstilkynning

Útför

Aðstandendur

Afi Andrés - kveðja