Ástkær eiginmaður, sonur, faðir, tengdafaðir, bróðir og afi,

lést mánudaginn 4. september á Landspítalanum í Fossvogi.


Útförin fer fram í Digraneskirkju mánudaginn 18. september kl.13:00

Elma Stefanía Þórarinsdóttir

Við sendum innilegar samúðarkveðjur til ykkar kæra frændfólk og aðstandendur.
Elma og Esjar🙏🌷

Ástríður Jóhanna Jensdóttir

Innilegar samúðarkveðjur til ykkar kæra fjölskylda .
Hugur minn er hjá ykkur í dag.

Ástríður Jensdóttir

Guðbjörg Ásta Guðmundsdóttir

Innilegar samúðarkveðjur, guð styrki ykkur og blessi

Kær kveðja,

Guðbjörg Ásta Guðmundsdóttir

[DEFAULT]

Það er eitthvað svo óraunverulegt að setjast niður og skrifa þessi minningarorð. Hugsunin um að ég eigi bara aldrei eftir að sjá þig aftur er mjög sár, skrýtin og ósanngjörn. Það verður skrýtið að keyra austur á Selfoss og kíkja í heimsókn til Kitty og Elsubet og hugsa til þess að þú verðir ekki þar, búinn að reiða fram gómsætt salat hvort sem það var hangikjöts eða skinkusalat til þess að hafa með brauðinu, kexinu og kaffinu. Síðasta skiptið sem ég kom í heimsókn til ykkar á Selfoss á 71 árs afmælisdaginn þinn sá ég að þú varst að verða svolítið lúinn og þreytulegur enda lungnaþemban farin að hrjá þig meira og meira með hverjum deginum og var virklega farin að láta finna fyrir sér. Þér sem fannst alltaf gaman í mannfögnuðum og veislum, fá fólk í heimsókn og keyra um sveitirnar og til Reykjavíkur treystir þér varla út úr húsi lengur. Í þessari heimsókn til ykkar þá fékk ég slæma tilfinningu  ég sá hvað líkaminnn þinn varð orðinn veikur og kannski væri ekki svo mikið eftir.  En alltaf hélt maður í vonina og þú svo sannarlega gafst okkur öllum ástæðu til þess að vera bjartsýn. Því sama hversu oft þú lentir upp á spítala eða fórst í öndunarstopp þá komstu alltaf í gegnum það og komst bara hressari til baka. Bara eins og þetta væri smá hvíldarinnlögn. Þessi síðasta spítala innlögn þín var eitthvað öðruvísi og veltum við systur því fyrir okkur hvort að við værum orðnar svona sjóaðar í spítalaheimsóknum og að við vissum bara að allt yrði í góðu lagi og að þú yrðir komin heim eftir nokkar daga, eða gat það verið að núna væri kannski komið að leiðarlokum sem reyndist því miður vera hið rétta. Mikið er ég þakklát fyrir að hafa verið hjá þér þessa síðustu daga þína og verið hjá þér þegar að endalokunum kom þrátt fyrir að þeir dagar hafi verið mjög erfiðir. 

Elsku pabbi á þessum tímamótum sit ég yfir gömlum myndum og minningum og hlusta á þau lög sem minna mig mest á þig , Kim Larsen, Phil Collins og Tommy Nilsson og rifja upp öll þau ár sem við áttum saman, sumar minningar er brösótt að rifja upp, og átti bakkus alla sök á því en ég ætla bara að staldra við þær góðu. Góðar minningar frá heimsókn okkar til þín til Svíþjóðar, meðan þú bjóst í Svíþjóð þá varstu duglegur að senda bréf í pósti til að upplýsa okkur um stöðu mála hjá þér og kanna hvernig við höfðum það hérna heima á Íslandi. Næstu dagar verða notaðir í að fara ferð niður í geymslu þar sem lesin verða öll þau bréf sem ég fékk frá þér þegar þú bjóst úti. Einnig rifjast upp góðar minningar þegar þú komst í heimsókn til Íslands og fórst með okkur í dagsferðir innanlands. Þú elskaðir að ferðast um landið og ég veit að þig langaði að gera mikið meira af því og þá sérstaklega að sýna Kitty og Elsubet allt það sem þetta land hafði upp á að bjóða , en heilsan þín bauð því miður ekki upp á það. Mikið sem ég hefði óskað þess að þú hefðir getað fengið lengri tíma með elsku Kitty og Elsubet  og okkur öllum og að þú hefðir fengið tækifæri til að sjá Elsubet þroskast og eldast. Þó svo þú hafir ekki verið maður mikilla orða og látið tilfinningar þínar mikið í ljós, sérstaklega í tengslum við okkur eldri börnin þín þá fann maður það alltaf að þú varst stoltur af okkur og elskaðir okkur heitt og maður vissi innst inni að þú hefðir vilja gefa miklu meira af þér og þú varst þakklátur fyrir okkur og fyrir allt sem við höfðum aðstoðað þig með í gegnum tíðina. 

Núna þegar ég horfi til baka þá er ég þakklát fyrir allan þann tíma og það samband sem við áttum. Ég á eftir að sakna þess að spjalla við þig á Facebook um daginn og veginn, ræða veðrið næstu daga og taka á móti þessum lúmsku bröndurum þínum sem komu þegar maður átti síst von og þá gastu svo sannarlega látið mann hlægja, þú varst klárlega skemmtilegur og fyndinn karakter elsku pabbi. Ég er sérstaklega þakklát fyrir hvað elsku Kitty hugsaði vel um þig allan þann tíma sem þið áttuð saman og sást það í augum þínum þegar þú fylgdist með Elsubet hvað hún lýsti upp tilveruna þína og hvað þú elskaðir þær heitt og hversu þakklátur þú varst fyrir þær.

Ég veit að þú ert kominn á góðan og fallegan stað þar sem þú þarft ekki að hafa áhyggjur af neinu. Elsabet og Kitty eru og verða í góðum höndum og við munum passa upp á þær. 

Hvíldu í friði elsku pabbi – ég elska þig.

Í dag kveðjum við í hinsta sinn Ágúst bróðir okkar. Hann hefur undanfarin ár átt við heilsuleysi að stríða og hefur sýnt ótrúlegan lífsvilja í baráttu sinni við veikindi sín. Þær eru ófáar ferðirnar sem hann hefur farið með sjúkrabíl suður til Reykjavíkur og við haldið að nú væri kallið komið. En kallið kom 4. september síðast liðinn. 

Ágúst var elstur okkar systkinanna, ólst upp í Vogahverfinu í Reykjavík og gekk í Langholtsskóla. Ungur hóf hann störf sem háseti á Gullfoss sem sigldi til norðurlanda. Úr ferðum sínum kom hann færandi hendi með gjafir til systkina sinna og foreldra. 

Hann kynntist ungur Stefaníu Emmu Ragnarsdóttur, ekki leið á löngu þar til  þau eignuðust sitt fyrsta barn, en saman eignuðust þau fjögur börn; Rögnu, Tryggva, Lilju og Önnu. Þau bjuggu lengst af í Breiðholtinu en fluttust svo í Ártúnsholtið. Leiðir Ágústar og Stefaníu skildu en hann fluttist til Svíþjóðar þar sem hann starfaði um nokkurra ára skeið m.a. hjá Volvo í Gautaborg.

Ágúst gekk að eiga Juthamat Stefánsson eða Kitty eins og hún er kölluð og eignuðust þau dótturina Elsu. Hann var afar stoltur af Elsu litlu sem var að hefja sína skólagöngu nú í haust.  

Ágúst var mikill áhugamaður um fótbolta og enska knattspyrnu og fylgdist mjög vel með allt til dauðadags. Daginn fyrir andlátið vildi hann fá að fylgjast með leik Fram og Víkings í bestu deild karla, en Fram var alla tíð hans lið í íslenskum fótbolta. Sem unglingur var hann duglegur að taka litla bróður sinn með sér á fótbolta- og handboltaleiki og á Bjarni margar góðar minningar frá þeim tímum með Ágústi.

Hann hafði einnig áhuga á tónlist og hafði gaman af því að hlusta á bítlana og fleiri hljómsveitir sem hann spilaði fyrir okkur þegar við vorum krakkar. Eins hafði hann gaman af veiði á sínum yngri árum.

Ágúst var snyrtimenni í eðli sínu, vildi líta vel út og hafa snyrtilegt í kringum sig. Hann hafði skemmtilegan húmor og oft duttu út úr honum gullkorn sem enginn átti von á. Hann var rólegur og hlédrægur að eðlisfari en fylgdist vel með og var áhugasamur um málefni líðandi stundar.

Nú er Ágúst bróðir okkar farinn í Sumarlandið. Blessuð sé minning hans. 
Guðrún, Sigrún, Bjarni og Bogga

Þó svo að ég vissi síðustu ár að tími þinn hér yrði ekki mikið lengri þá er samt svo sárt og erfitt að kveðja. Það var ótrúleg seigla í þér í veikindum þínum og þú barðist fram á síðasta dag að eiga eins marga daga og þú mögulega gast með Kitty þinni og Elsu. Þér þótti erfitt að þurfa að kveðja þær svona fljótt 

Það var gaman að fylgjast með hvað Elsa, litla stelpan þín, gaf þér mikinn tilgang og gleði og þú varst sennilega hamingjusamari síðustu ár en mörg ár á undan og er ég þakklát fyrir að hafa orðið vitni að því. Það var skondið að fá fyrirspurnir frá þér um ýmis ráð varðandi Elsu hvort sem það var uppeldisráð eða veikindaráð og fann ég hvað þér fannst gott að leita til okkar systra enda langt síðan þú varst í þessum sporum.  Kitty var þér góð eiginkona og hugsaði vel um þig þegar þú varst sem veikastur og ég veit að þú varst henni mjög þakklátur.

Þú varst mjög stoltur af börnum þínum og það leyndi sér ekki. Þú fylgdist vel með fólkinu þínu og ég fann hvað þér fannst gaman að fá fréttir og myndir af fótboltamótum hjá Viktori enda varstu mikill áhugamaður um fótbolta.  Þú fylgdist með fótboltanum fram á síðasta dag.

Þú varst ekki maður margra orða en samt vissi maður alltaf hvað þér þótti vænt um fólkið þitt. Einnig skynjaði maður líka sorgina þína og hefði ég svo mikið viljað að þú hefðir fengið aðstoð við þeim áföllum sem þú varst fyrir ungur að árum. Þú ræddir það ekki mikið en það var líka svolítið tíðarandinn að gera það ekki og kljást við vandamálin á annan hátt.

Þú hafði marga góða hæfileika. Þú hafðir þú mjög gaman af því að taka ljósmyndir og varst oft á tíðum með myndavélina uppi og áttir stórt safn af myndum af okkur börnum þínum. Einnig varstu duglegur að taka myndir í jólaboðum og öðrum viðburðum í fjölskyldunni. Þú varst mjög lunkinn við að elda góðan heimilismat og man ég sérstaklega eftir sunnudags hryggnum og steiktum kjúklingi og ekki má gleyma heimatilbúnu karamellunum sem þú bjóst stundum til þegar ég var lítil enda mikill sætindamaður. Þú varst ótrúlega fyndinn og kunnir alltaf að læða inn góðu gríni þegar maður átti síst von á. Meira segja síðustu dagana þína á spítalanum þá gastu gantast þrátt fyrir að eiga erfitt með að tala. 

Þú elskaðir að hlusta á tónlist og man ég sem ung stelpa eftir að þú blastaðir Queen og annarri góðri tónlist. Þú varst einnig mikið snyrtimenni og man ég alltaf eftir að heimili þín voru falleg og hrein. Þú passaðir líka alltaf upp á þú værir snyrtilegur og nýklipptur.

Elsku pabbi ég mun gera mitt besta til þess að styðja og styrkja Kitty og Elsu þvi ég veit að þú myndir vilja það. 

Minningarsíður

Nýleg andlát

Útfarir

Hlaðvarp

Þjónustusíða

Fræðsluefni

Ágúst Stefánsson

Andlátstilkynning

Útför

Aðstandendur

Þakkir

Ertu með minningargrein?