Að tilkynna andlát

Ef nánustu aðstandendur eru ekki viðstaddir andlát er haft samband við þá eins fljótt og mögulegt er. Ef um er að ræða banaslys er algengt að prestur eða lögreglumaður tilkynni aðstandendum andlátið.

Næst er haft samband við vini og ættingja í innsta hring manneskjunnar sem er látin. Stundum treysta nánustu aðstandendur sér ekki til þess og fela það vini eða fagaðila. Þegar þarf að tilkynna barni andlát er mikilvægt að það sé gert á rólegan og yfirvegaðan hátt af einhverjum sem barnið treystir.

Nánasti aðstandandi eða fulltrúi aðstandenda fær dánarvottorð frá lækni eða heilbrigðisstofnun og afhendir það sýslumanni skriflegt eða rafrænt. Sýslumaður tilkynnir andlátið til Þjóðskrár Íslands.

Æskilegt er að aðstandendur tilkynni öðrum skyldmennum og vinum manneskjunnar sem er látin um andlátið áður en fregnir af því birtast opinberlega. Færslur á samfélagsmiðlum sem skýra frá andláti lúta sama lögmáli. Því er mikilvægt að stíga gætilega til jarðar í þeim efnum.

Þegar andlát hefur verið tilkynnt á Minningar.is er andlátstilkynningin birt undir Nýleg andlát á vefnum í tvær vikur frá dánardegi. Hægt er að deila andlátstilkynningunni með einföldum hætti á samfélagsmiðlum og birtist hún þá sem fallegt spjald sem sýnir tilkynningartextann, mynd af hinni látnu manneskju, fæðingardag og dánardag. 

Fréttamönnum og fulltrúum fjölmiðla ber skylda til að hafa samráð við presta eða lögreglu um það hvenær tímabært sé að birta nafn manneskju sem hefur látist af slysförum og er meginreglan sú að þá sé búið að ná í flesta eða alla nánustu aðstandendur.

Þegar búið er að stofna minningarsíðu á Minningar.is má með einföldum hætti deila henni á samfélagsmiðlum og tilkynna þannig andlátið í samfélaginu. Á minningarsíðu á Minningar.is koma einnig fram upplýsingar um útför ef fólk kýs að auglýsa hana. Eins má setja hlekk á streymi frá útförinni sé henni streymt á netinu.  

Ef útförin fer fram í kyrrþey mælum við með því að stofna minningarsíðu á Minningar.is að athöfn lokinni.